މަސްތުވާތަކެތީގެ ވަބާގެ ތެރެއަށް އަހަރެއްގެ ތެރޭގައި ފަސްސަތޭކައެއްހާ މީހުން ވަންނަ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.

ފުލުހުންގެ 90ވަނަ އަހަރީ ދުވަސް ފާހަގަކުރުމުގެ ގޮތުން ރޭ ބޭއްވި ޖަލްސާގައި ވާހަކަދައްކަވަމުން ސީޕީ ހަމީދު ވިދާޅުވީ، ފުލުހުންގެ ތަފާސް ހިސާބުން ދައްކާ ގޮތުން މަސްތުވާތަކެތީގެ ވަބާގެ ތެރެއަށް ކޮންމެ އަހަރަކުވެސް އަލަށް 400 އާއި 500އާ ދެމެދުގެ އަދަދަކަށް އެކި އުމުރުފުރައިގެ މީހުން ވަންނަކަމަށެވެ. އަދި ޚާއްސަކޮށް އަލަށް ތައާރަފްވާ ތަފާތު ބާވަތްތަކުގެ މަސްތުވާތަކެއްޗާއެކު ޒުވާނުން އެކަމުގެ ތެރެއަށް ވަންނަ މިންވަރު އިތުރުކަމަށް ސީޕީ ވިދާޅުވިއެވެ.

"މިކަން ހައްލުކުރުމަށް ފުލުހުން ހިމެނޭގޮތުން ޖިނާއީ ޢަދުލުގެ ނިޒާމާއި މި މައްސަލައާ ގުޅުން ހުރި ދައުލަތުގައި ހިމެދޭނޭ ހުރިހާ އިދާރާތަކުން އެއް މިސްރާބަކަށް މަސައްކަތްކުރަން ޖެހޭ." ސީޕީ ވިދާޅުވިއެވެ.

ސީޕީ ޙަމީދު ވިދާޅުވީ، ފާއިތުވި އަހަރު އެކަނި ވެސް 13،000 އަށް ވުރެ ގިނަ ޖިނާއީ މައްސަލަތައް ފުލުހުން ތަހުގީގުކުރިކަމަށެވެ. އަދި ކުށްކުރުމާއި އެ ކަމުގެ ބިރުވެރިކަން އެއްކޮށް ނައްތައިލުމަކީ އެއްްވެސް މުޖުތަމައެއްގައި ކުރެވޭނެ ކަމެއް ނޫންކަމަށާއި، ނަމަވެސް ކުރެވެން އޮތް ކަމަކީ އެ ފަދަ ނުރައްކާތައް ވީހާ ވެސް މަދުކުރުންކަމަށް ޙަމީދު ވިދާޅުވިއެވެ.

ރޭގެ ޖަލްސާގައި ސީޕީ ޙަމީދު ވިދާޅުވީ، ކުށުގެ މާޙައުލަށް ވަންނަ މީހުންގެ ޢަދަދު އިތުރުވުމަކީ ކަންބޮޑުވުމެއް ކަމަށާއި، ހަމައެއާއެކު ފުލުހުންގެ މުއައްސަސާއާ މެދު ރައްޔިތުން ކުރާ އިތުބާރާއި ގަދަރު މިހާރަށްވުރެ އިތުރުކުރުމަށްޓަކައި މުހިންމު މަސައްކަތްތަކެއް ކުރަންޖެހޭކަމަށެވެ.