މިއަހަރުގެ ފުރަތަމަ ކުއާޓަރގެ އާމްދަނީގެ ގޮތުގައި އެސްޓީއޯއަށް 4.4 ބިލިއަން ރުފިޔާ ލިބިއްޖެއެވެ.

އެސްޓީއޯގެ އަހަރީ ހިސާބުން ދައްކާގޮތުގައި މި ކުއާޓާގައި އެސްޓީއޯއަށް ޢާމްދަނީގެ ގޮތުގައި ލިބުނު 4.4 ބިލިއަން ރުފިޔާއަކީ މިދޔަ އަހަރުގެ ފުރަތަމަ ކުއާޓާރއާ އަޅާ ބަލައިއިރު 10 އިންސައްތައިގެ ކުރިއެރުމެކެވެ. އެހެން ނަމަވެސް ކުންފުނީގެ މައިގަނޑު ވިޔަފާރި ކަމަށްވާ ތެލުގެ އަގަށް އައި ބަދަލާއިއެކު، މިދިޔަ އަހަރުގެ ހަތަރު ވަނަ ކުއާޓާރއާއި އަޅާބަލާއިރު އެސްޓީއޯގެ އާމްދަނީ ވަނީ 3 އިންސައްތައިން ދަށްވެފައެވެ.

އެސްޓީއޯގެ ޖުމްލަ އާމްދަނީ އިތުރުކުރެވުމާއިއެކު ޖުމްލަ ފައިދާގެ ގޮތުގައި ވަނީ 809 މިލިއަން ރުފިޔާ ލިބިފައެވެ. މިއީ އޭގެ ކުރީ ކުއާޓާރއާ އަޅާ ބަލައިއިރު 19 އިންސައްތައިގެ ކުރިއެރުމެކެވެ. ޖުމްލަ ފައިދާ އިތުރުވުމާއިއެކު ހިންގުމުގެ ފައިދާގެ ގޮތުގައި ވަނީ 503 މިލިއަން ރުފިޔާ ލިބިފައެވެ.

ޓެކްސްއަށް ކެނޑުމުގެ ކުރިން މިކުއާޓާރގެ އެސްޓީއޯގެ ސާފު ފައިދާއަކީ 436 މިލިއަން ރުފިޔާއެވެ. ޓެކުހަށް ކެނޑުމަށްފަހު، މި ކުއާޓާރގެ ސާފުފައިދާގެ ގޮތުގައި ވަނީ 368 މިލިއަން ރުފިޔާ ލިބިފައެވެ. މިއީ އޭގެ ކުރީ ކުއާޓާރއާއި އަޅާބަލައިއިރު 37 އިންސައްތައިގެ ކުރިއެރުމެކެވެ. މީގެ މައިގަނޑު ސަބަބަކީ، ކުންފުނިން ކުރަމުން ގެންދާ ވިޔަފާރީތައް ރަގަޅުކުރެވި ޖުމްލަ ފައިދާ އިތުރުކުރެވިފައިވުމާއި އަދި ހިންގުމުގެ ހަރަދު އޭގެ ކުރީ ކުއާޓާރއާއި އަޅާބަލާއިރު ދަށްކުރެވިފައިވުމެވެ.

ފާއިތުވި ކުއާޓަރގައި އެސްޓީއޯގެ ހިއްސާ ވަނީ އެންމެ މަތިން 1450 ރުފިޔާ އަދި އެންމެ ދަށުން 1200 ރުފިޔާ ގައި ޓްރޭޑްކުރެވިފައި ކަމަށް ހިސާބުތަކުން ދައްކައެވެ. ފާއިތުވި ކުއާޓަރގައި ޖުމްލަ 56 ހިއްސާ މުއާމަލާތުކުރެވިފައިވާއިރު އެސްޓީއޯގެ މާކެޓް ކެޕިޓަލައިޒޭޝަން އުޅެނީ 1735 މިލިއަން ރުފިޔާގައެވެ. އަދި އެކުންފުނީގެ ހިއްސާއަކަށް ޖެހުނު ފައިދާ ހުރީ 327 ރުފިޔާގައި ކަމަށް އެކުންފުނިން މަޢުލޫމާތުދެއެވެ.