ތ. ހިރިލަންދޫގައި ރޭ ހިންގި މާރާމާރީއަކާ ގުޅިގެން ދެމީހަކު ހައްޔަރުކޮށް ދެމީހަކަށް ހޮސްޕިޓަލްގައި ފަރުވާދެމުންދާ ކަމަށް ފުލުހުން ހާމަކޮށްފިއެވެ.

ދިވެހި ފުލުހުންގެ ޚިދުމަތުން މިއަދު ބުނެފައިވަނީ ހިރިލަންދޫ ގެއެއްގެތެރޭގައި ރޭ 22:00 ހާއިރު މާރާމާރީއެއް ހިންގާފައިވާ ކަމަށެވެ.

އެމާރާމާރީއާ ގުޅިގެން 49 އަހަރާއި 43 އަހަރުގެ ދެމީހަކަށް ތޫނު އެއްޗަކުން ހަމަލާދީ ޒަޚަމް ކޮށްލާފައިވާ ކަމަށް ފުލުހުން ވަނީ ބުނެފައެވެ. އެދެމީހުންނަށް ހިރިލަންދޫ ސިއްހީ މަރުކަޒުން ފަރުވާ ދިނުމަށްފަހު މިހާރު ވޭމަންޑޫ ހޮސްޕިޓަލަށް ގެންގޮސް ފަރުވާ ދެމުން އަންނަ ކަމަށް ފުލުހުން މަޢުލޫމާތު ދެއެވެ.

ފުލުހުންބުނީ މިމައްސަލައާއި ގުޅިގެން ފުލުހުންގެ އަމުރަށް ނުކިޔަމަންތެރިވި މައްސަލައާއި ރަށުގެ އަމަން އަމާންކަން ނަގާލަން މަސައްކަތް ކުރުމުގެ ކުށުގައި އުމުރުން 32 އަހަރުގެ މީހަކާއި 36 އަހަރުގެ މީހަކު ވަނީ ހައްޔަރު ކޮށްފައި ކަމަށެވެ.

ފުލުހުން ބުނީ މި މައްސަލަ އިތުރަށް ތަޙުޤީޤު ކުރަމުންދާ ކަމަށެވެ.