ރ. ފުއްގިރި ކުއްޔަށް ދޫކުރުމުގެ މުޢާމަލާތުގައި ރައީސް ޔާމީންގެ މައްޗަށް އުފުލާފައިވާ ދަޢުވާތަކުގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި މިއަދު ކުރިއަށް ގެންގޮސްފިއެވެ.

ރ. ފުއްގިރި ކުއްޔަށް ދޫކުރުމުގެ މުޢާމަލާތާއި ގުޅިގެން ޕްރޮސިކިއުޓާ ޖެނަރަލްގެ ފަރާތުން ކުރީގެ ރައީސް ޔާމީންގެ މައްޗަށް އުފުލާފައިވަނީ މަނީ ލޯންޑަރިން ކުށުގެ ދައުވާ އާއި ރިޝްވަތު ގަބޫލު ކުރެއްވުމުގެ ދައުވާ އެވެ. މި މައްސަލާގައި ކ. މާލެ، މއ. ކުރިކީލަހިޔާ، އަހުމަދު ކްރިކް ރިޟާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށްވެސް ދަޢުލަތުން ވަނީ ދަޢުވާ އުފުލާފައެވެ.

ރ. ފުއްގިރި މައްސަލައިގެ އިބްތިދާއީ އަޑުއެހުމުގައި ރައީސް ޔާމީން ވަނީ އެމަނިކުފާނުގެ މައްޗަށް އުފުލާފައިވާ ދަޢުވާތަކަށް އިންކާރު ކުރަށްވާފައެވެ. އަދި ދެފަރާތުންވެސް ވަނީ މައްސަލާގައި ހެކި ހުށައަޅައިފައެވެ. އެގޮތުން މި މައްސަލައިގައި ދައުލަތުން ރައީސް ޔާމިނާއި ދެކޮޅަށް 82 ހެކި ވަނީ ހުށަހަޅާފައެވެ. އަދި ރައީސް ޔާމީންގެ ފަރާތުން ދިފާއުގައި 30 ހެކި ހުށަހެޅިއެވެ.

މިއަދުގެ އަޑުއެހުމުގައި ރައީސް ޔާމީންގެ ފަރާތްޕުޅުންވަނީ މައްސަލައިގެ އިފްތިތާޙީ ބަޔާން އިއްވަވާފައެވެ. އިފްތިތާހީ ބަޔާން އިއްވަވަމުން ރައީސް ޔާމީންގެ ވަކީލުން ވިދާޅުވެފައިވަނީ، ދައުލަތުން ތުހުމަތުކުރާ ފައިސާގެ މުއާމަލާތަކީ، މީދޫ ދާއިރާގެ މެންބަރު އަހުމަދު ސިޔާމް މުހައްމަދު އަތުން 1.1 މިލިއަން ޑޮލަރު ގަތުމަށް ކޮށްފައިވާ މުއާމަލާތެއް ކަމަށެވެ. އޭގެ އިތުރުން ދައުލަތުގެ ބައެއް ހެކިތަކަށް ބެލުމުންވެސް ރައީސް ޔާމީން ރިޝްވަތު ހިފުމާއި އެ ފައިސާ ލޯންޑަކުރެއްވުމުގެ އެއްވެސް އަމަލެއް ހިންގާފައި ނެތްކަން ސާބިތުވާ ކަމަށް ޑރ. ޖަމީލު ވިދާޅުވި އެވެ.

ޑރ. ޖަމީލް ވިދާޅުވީ، އެމްއެމްޕީއާރުސީ މެދުވެރިކޮށް ރަށްރަށް ކުއްޔަށް ދޫކުރުމުގައި އެ ރަށުގެ އެކުއިޒިޝަން ކޮސްޓް ކަނޑަައަޅާ ގޮތުގެ ގަވާއިދުގައި ބަޔާންކުރާ ފޯމިއުލާއިން ފުއްގިރީގެ އަގުގެ ގޮތުގައި އޮތީ ގާތްގަނޑަކަށް 1.1 މިލިއަން ޑޮލަރު ކަމަށެވެ. އެގޮތުން ދުބާއީގެ ކްލެސިކް ސިޓީ އައިލެންޑް ހޯލްޑިންގްސްއަށް އެ ރަށް ދިނީ 1.55 މިލިއަން ޑޮލަރަށް ކަމަށާއި، އެހެންކަމުން އެރަށަށް 2.6 މިލިއަން ޑޮލަރު ހޭދަކުރިކަމަށް ބުނުމަކީ، ހަމަ ބުއްދީން ގަބޫލުކުރެވޭނެ ވާހަކަތަކެއް ނޫން ކަމަށްވެސް ޑރ. ޖަމީލު ވިދާޅުވި އެވެ.

ރައީސް ޔާމީންގެ ފަރާތްޕުޅުން މިއަދު ވަނީ، ޖިނާއީ އިޖުރާއަތުގެ ގާނޫނުގެ 145 ވަނަ މާއްދާގެ (ރ) ގެ ދަށުން ދައުލަތުގެ ބައެއް ހެކިތައް ބަލައިނުގަތުމުގެ އިއުތިރާޒެއް ހުށަހަޅަން އެދިވަޑައިގެންފައެވެ. އެހެންކަމުން މާދަމާ ހެނދުނު 10:00 ގެ ކުރިން އެ އިއުތިރާޒު ލިޔުމުން ހުށަހެޅުއްވުމަށް ޤާޟީ ޢަދީ ނަދީމް އެންގެވިއެވެ.

މައްސަލަ ބައްލަވާ ޤާޟީ އަލީ ނަދީމް މިއަދުގެ އަޑުއެހުން ނިންމަވާ ލައްވާފައިވަނީ، އަންނަ އާދީއްތަ ދުވަހު ހެނދުނު 9:30 ގައި ހެކިބަސް ނަގަން ފަށާނެކަން އިޢުލާނު ކުރެއްވުމަށް ފަހުއެވެ. އެ ދުވަހު އަހުމަދު ސިޔާމް މުހައްމަދު ހިމެނޭހެން 6 ހެއްކެއްގެ ހެކިބަސް ނެގުމަށް ވަނީ ތާވަލުކޮށްފައެވެ.

ރ. ފުއްގިރި މައްސަލާގައި ޕީޖީ އޮފީހުން ބުނެފައިވަނީ، މި މައްސަލާގެ ތެރެއިން ކުށުގައި ހިމެނޭ ފައިސާގެ ގޮތުގައި 1،349،885 ޑޮލަރާއި ކުށުގެ އަމަލުން ހޯދި ފައިސާއާ އެއްކޮށްފައިވާ 2،295،250 ޑޮލަރާއި ޖޫރިމަނާގެ ގޮތުގައި 34،689،425 ޑޮލަރު ދައުލަތަށް އަނބުރާ ހޯދުމަށް މަސައްކަތް ކުރާނެ ކަމަށެވެ. އަދި މި މައްސަލާގައި ދަޢުލަތުންވަނީ ރައީސް ޔާމީނަށް ލިބިފައިވާ ޢާމްދަނީއާއި ނުބައްދަލު ފައިސާ އާއި މުދާ ދަޢުލަތަށް ނަގައިދިނުމަށް އެދިފައެވެ.

މިއީ އެމްއެމްޕީއާރުސީގެ ބޮޑު ޚިޔާނާތާ ގުޅުވައިގެން ރައީސް ޔާމީންގެ މައްޗަށް ދައުވާ އުފުލާފައިވާ ތިންވަނަ މައްސަލައެވެ. މީގެކުރިން ގއ. ވޮޑަމުލާ ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު މަނީލޯންޑަރ ކުރި މައްސަލައެއް ސާބިތުވެ ރައީސް ޔާމީނަށް ވަނީ، 5 އަހަރުގެ ޖަލު ޙުކުމެއް އިއްވާފައެވެ. ނަމަވެސް އެޙުކުމް ސުޕްރީމް ކޯޓުން ބާތިލުކުރިއެވެ.

އޭގެފަހުން ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ރައީސް ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލާގައި ރިޝްވަތާއި މަނީލޯންޑަރ ކުރުމުގެ ކުށް ކޮށްފައިވާކަން ސާބިތުވެ 11 އަހަރުގެ ޖަލު ހުކުމެއް ރައީސް ޔާމީން މިހާރު ގެންދަވަނީ ޖަލުގައި ތަންފީޒު ކުރަށްވަމުންނެވެ.