މާލެއާއި މީމު އަތޮޅާ ދެމެދު ދަތުރުކުރާ ސަވާރީ ބޯޓު ދިޔައީ އަޑިއަށް ކަމަށާއި އެ ބޯޓުން ދަތުރު ކުރި 6 މީހުން ސަލާމަތް ކޮށްފައިވާކަމަށް އެމްއެންޑީއެފުން ހާމަކޮށްފިއެވެ.

އެމްއެންޑީއެފުން ބުނީ، ސަވާރީ ބޯޓުން ދަތުރުކުރި 6 މީހުން ފެނިފައި ވަނީ ކޯސްޓްގާޑުން ހޯދަމުންދިޔަ ސަރަހައްދުގެ ތެރެއިން މިއަދު އެމްއެންޑީއެފް ޑޯނިއަރ އެއަރކްރާފްޓަށް ކަމަށެވެ. މި ހަ މީހުން މިހާރު ކޯސްޓްގާޑް ޝިޕް ޣާޒީއަށް ނަގާފައިވާއިރު އެންމެންގެ ހާލު ރަނގަޅު ކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފުން ބުނީ، ސަވާރީ ބޯޓް އަޑިއަށް ގޮސްފައިވާކަމަށް ބޯޓުގެ ކެޕްޓަން މަޢުލޫމާތުދީފައިވާ ކަމަށެވެ. އެމްއެންޑީއެފުން މީޑިއާ އަށް ޙިއްސާކޮށްފައިވާ ޗާޓުން ދައްކާ ގޮތުން މީހުން ފެނުނީ ބޯޓު އަޑިއަށް ގޮސްފައިވާ ހިސާބަށްވުރެ ދުރުންނެވެ.



ސަވާރީ ބޯޓުގެ ޚަބަރެއް ނުވެގެން އެބޯޓު ހޯދުމުގެ މަސައްކަތް ކޯސްޓްގާޑުން ފަށާފައި ވަނީ މިއަދު ހެނދުނުއެވެ. ސަވާރީ ބޯޓުގެ ވައިބަރ ގްރޫޕްގައި ރޭ 1:20 ގައި ބުނެފައިވަނީ ބޯޓު މާލެއިން ފުރައިގެން ވ. ފެލިދޫ އަށް ދަތުރުކުރަމުންދާ ކަމަށެވެ. ނަމަވެސް އޭގެ ފަހުން އެގްރޫޕްވެސް އަޕްޑޭޓް ވެފައެއް ނުވެއެވެ.

މި ދުވަސްވަރު ރާއްޖޭގެ ބޮޑު ސަރަހައްދަކަށް މޫސުން ގޯސްވެ މެޓު އޮފީހުންވަނީ ލ. އަތޮޅުން ފެށިގެން އައްޑޫ ސިޓީއާ ހަމައަށް އަދި ކ. އަތޮޅުން ފެށިގެން ވ. އަތޮޅާ ހަމައަށް ރީނދޫ ސަމާލު ނެރެފައެވެ.

މެޓުން ބުނީ މި ސަރަހައްދުތަކަށް ގުގުރުމާއެކު ބޯކޮށް ވާރޭވެހި ކަނޑުތައް ގަދަވުން އެކަށީގެންވާކަމަށެވެ. އަދި 45 މޭލަށް ވައިބާރުވާނެކަމަށް ލަފާ ކުރެވޭކަމަށެވެ.