30 މީހުންނާއެކު ދަތުރު ކުރަމުންދަނިކޮށް ރާޅެއް އަރައިގެން ދިޔަވަމުންދިޔަ ވިޝަން އެކްސްޕްރެސް ލޯންޗާ މިހާރު މުއާމަލާތް ނުކުރެވޭ ކަމަށާއި، ލޯންޗު ލޮކޭޓް ނުކުރެވޭ ކަމަށް އެމްއެންޑީއެފުން ހާމަކޮށްފިއެވެ.

އެމްއެންޑީއެފުން މީގެ ކުޑައިރުކޮޅެއްކުރިން ބުނެފައިވަނީ މާލެއިން ފުރައިގެން ދ. މީދުއަށް 30 މީހުންނާއެކު ދަތުރުކުރަމުން ދިޔަ ލޯންޗަކަށް ރާޅެއް އަރައި ދިޔަވާތީ އެލޯންޗު ހޯދުމުގެ މަސައްކަތް ސިފައިން ފަށާފައިވާ ކަމަށެވެ.

އެމްއެންޑީއެފުން ބުނީ، އެ ލޯންޗުގައި އަންހެނުންނާއި ކުޑަކުދިންވެސް ތިބި ކަމަށެވެ. އެ ހާދިސާ ހިނގާފައިވަނީ ފ. ފީއަލީގެ ގާތްގަނޑަކަށް ހަތް ނޯޓިކަލް މޭލު ބޭރުންނެވެ.

އެލޯންޗަށް އެހީތެރިކަން ފޯރުކޮށްދިނުމަށް ފ.ފިލިތެޔޮ ރިސޯޓުން ދޯންޏަކާއި ފީއަލީ ދޯންޏަކާއި ސްޕީޑް ބޯޓެއް ފުރާފައިވާކަމަށް އެމްއެންޑީއެފުން ބުނެއެވެ. ހަމައެއާއެކު އެމްއެންޑީއެފް ކޯސްޓްގާޑުގެ ހާބާ ކްރާފްޓެއް ވެސް އެ ލޯންޗް އޮތް ސަރަހައްދަށް މިހާރު ދަނީ ދަތުރު ކުރަމުންނެވެ.

އެމްއެންޑީއެފުން ދާދި ދެންމެއަކު ބުނީ ލޯންޗް މިހާރު ފ. މަގޫދޫ ކައިރިން އަތޮޅަށް ވަންނަން ދަތުރުކުރަމުންދާ ކަމަށެވެ. އަދި ލޯންޗުގައި ތިބި މީހުންގެ ޙާލު ރަނގަޅުކަމަށްވެސް އެމްއެންޑީއެފުންވަނީ ބުނެފައެވެ.

އެމްއެންޑީއެފުން ބުނީ ލޯންޗު މިހާރު ރައްކާތެރިކަމާއެކު ދ. މީދޫ ފަޅަށް ވަދެފައިވާ ކަމަށެވެ.

މި ދުވަސްވަރަކީ ރާއްޖޭގެ މޫސުން ގޯސް ދުވަސްވަރަކަށް ވާތީ ކަނޑުދަތުރު ކުރުމުގައި އިތުރަށް ސަމާލުވުމަށް އެމްއެންޑީއެފުން ވަނީ އިލްތިމާސްކޮށްފައެވެ.