ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެންމެ އިސްކަމެއް ދެއްވަނީ ސިފައިންނަކީ ޕްރޮފެޝަނަލް ބަޔަކަށް ހެއްދެވުމަށްކަމަށް ދިފާޢީ ވަޒީރު މާރިޔާ އަޙްމަދު ދީދީ ވިދާޅުވެއްޖެއެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިޔަށް ގެންދިޔަ ފަޔަރ ފައިޓަރ ޓްރޭނިންގ ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައި މިނިސްޓަރ މާރިޔާ ވިދާޅުވީ، ސިފައިން ޕްރޮފެޝަނަލް ބަޔަކަށް ހެދުމަކީ ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު އެންމެ އިސްކަމެއް ދެއްވާ އެމަނިކުފާނުގެ ވަޢުދުފުޅެއް ކަމަށާއި އެ މަގްސަދު ހާސިލުކުރެވޭނީ ސިފަންނަށް ބޭނުންވާ ތަމްރީނާއި ހުނަރު ލިބިދީގެން ކަމަށެވެ.

އެ ރަސްމިއްޔާތުގައި މިނިސްޓަރ މާރިޔާ ވިދާޅުވީ، މިންތީގެ ހަމަހަމަކަން ހުރިހާ ދާއިރާއެއްގައި ޤާއިމްކުރެއްވުމަށް ރައީސް ޞާލިޙްގެ ސަރުކާރުން ކުރައްވަމުން ގެންދަވާ މަސައްކަތްޕުޅު ދިވެހި އަސްކަރިއްޔާގެ ތެރޭގައިވެސް ކާމިޔާބުކަމާއެކު ދަނީ ކުރިއަށް ކަމަށެވެ.

ހަމައެއާއެކު ފަޔަރ އެންޑް ރެސްކިއު ސަރވިސްއަށް ބޭނުންވާ އެކި ލެވެލްގެ ތަމްރީނުތައް ރާއްޖެއިން ބޭރުން ހޯދާ، އެފުރުޞަތުތަކަށް ސިފައިންގެ ފަޔަރ ފައިޓަރުން ފޮނުވައިގެން ތަމްރީނު ދެމުން ދާކަމަށް މާރިޔާ ވިދާޅުވިއެވެ. އެގޮތުން އިންޑިޔާ ،ޔޫ.އޭ.އީ އަދި ޔޫ.ކޭ ގައި ފަޔަރ ފައިޓަރުންވަނީ ތަމްރީންކުރެވިފައި ކަމަށް މިނިސްޓަރ ވިދާޅުވިއެވެ.

މިނިސްޓަރ މާރިޔާ އިތުރަށް ވިދާޅުވީ، މި ސަރުކާރަކީ ސިފައިންގެ ޕްރޮފެޝަނަލިޒަމް ކުރިއެރުވުމަށް އެންމެ ބޮޑު ސަމާލުކަމެއް ދިން ސަރުކާރު ކަމަށެވެ.