2021/2022 ވަނަ އަހަރުގެ މަތީ ސާނަވީ އިމްތިޙާނާއި، ސާނަވީ އިމްތިޙާނުތަކުން ޤައުމީ ގަދަ ދިހައެއްގައި 847 ދަރިވަރުން ހިމެނިއްޖެއެވެ.

ސާނަވީ އިމްތިހާނުންނާއި، މަތީ ސާނަވީ އިމްތިހާނުން އެންމެ ރަނގަޅު ނަތީޖާ ހާސިލުކުރާ ދަރިވަރުން ފާހަގަކޮށް ކޮންމެ އަހަރަކުވެސް ސަރުކާރުން "މަތީ އަރުތަވެރިންގެ އިނާމު" އެދަރިވަރުންނަށް ދެއެވެ.

އެގޮތުން 2021/2022 ވަނަ އަހަރު މަތީ ސާނަވީ އިމްތިޙާނުގެ ގަދަ ދިހައެއްގައި ހިމެނިފައިވަނީ 406 ދަރިވަރުންނެވެ. އަދި ސާނަވީ އިމްތިޙާނުގެ ގަދަ ދިހައެއްގައި ހިމެނިފައިވަނީ 441 ދަރިވަރުންނެވެ.

މިދިޔަ ދިރާސީ އަހަރު ސާނަވީ ތަޢުލީމު ނިންމައި، ދިވެހިރާއްޖެއިން 5،939 ދަރިވަރުން ވަނީ އެސް.އެސް.ސީ އަދި އޯލެވެލް އިމްތިޙާނުތަކުގައި ބައިވެރިވެފައެވެ. އަދި މަތީ ސާނަވީ ތަޢުލީމު ނިންމައި، ދިވެހިރާއްޖެއިން 2،849 ދަރިވަރުން ވަނީ އެޗް.އެސް.ސީ އަދި އޭލެވެލް އިމްތިހާނުތަކުގައި ބައިވެރިވެފައެވެ.

ސާނަވީ އިމްތިޙާނުގެ އެވޯޑް ދިނުމުގެ ހަފުލާ ބާއްވަން ސަރުކާރުން ނިންމާފައި ވަނީ ދެ ދުވަހަށް ބަހާލައިގެން، މި މަހުގެ 17 އަދި 18 ގައެވެ. މަތީ ސާނަވީ އިމްތިޙާނުގެ ގަދަ 10 ގެ އެވޯޑް ދިނުމުގެ ހަފްލާ ބާއްވަން ނިންމައިފައިވަނީ މި މަހުގެ 31 ގައި ކަމަށް ތަޢުލީމީ ވުޒާރާއިން ހާމަކޮށްފައިވެއެވެ.