ތަޢުލީމު ޙާޞިލްކުރަންވީ އުންމަތަށް ޚިދުމަތްކުރުމުގެ މަޤުޞަދުގައި ކަމަށް އިސްލާމިކް އޮގަނައިޒޭޝަން ފޯ ކަލްޗަރ އެންޑް ސިވިލައިޒޭޝަން (އައިއޯސީސީ)ގެ ރައީސް ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ޑރ ޝަހީމް މި މޭރުމުން ވިދާޅުވީ، މަދީނާގެ އިސްލާމިކް ޔުނިވަރސިޓީގެ ސަޤާފީ ފެސްޓިވަލްގައި ތަޤުރީރު ކުރަށްވަމުންނެވެ.

ޑރ ޝަހީމްގެ ވާހަކަފުޅުގައި ވަޒީފާއަށްޓަކައި ނުކިޔެވުމަށާއި އުންމަތަށް ޚިދުމަތްކުރުމުގެ މަޤުޞަދުގައި ތަޢުލީމު ޙާޞިލްކުރުމަށް ވަނީ ގޮވާލައްވާފައެވެ. އޭގެ އިތުރުން ވަގުތުގެ ބޭނުން ހެޔޮގޮތުގައި ހިފުމަށް ދަރިވަރުންނަށް ހިތްވަރު ދެއްވާފައިވެއެވެ. އަދި މެދުމިންކަމުގެ އިސްލާމީ މަންހަޖުގައި ހިފުމަށް ނަސޭޙަތްތެރިވެލެއްވިއެވެ.

ޑރ. ޝަހީމްގެ ތަޤުރީރުގައި އެމަނިކުފާނުގެ އަމިއްލަފުޅު ތަޖުރިބާތައް ޙިއްސާކުރަށްވަމުން ވިދާޅުވީ، ކިޔަވަން އުޅޭއިރު ހިތްދަތި ކަންތައްތައް ބައެއް ފަހަރު މެދުވެރިވާނެކަމާއި، އެކަންކަމަށް ކެއްތެރިވެ ހިތްވަރުކޮށްފިނަމަ އިތުރު ހަރުފަތަކަށް މީހާ ގެންގޮސްދޭނެ ކަމަށެވެ.

ޑރ. މުޙައްމަދު ޝަހީމް ޢަލީ ސަޢީދު ތައުލީމު ޙާޞިލް ކުރެއްވީ މަދީނާގެ އިސްލާމިކް ޔުނިވަރސިޓީގެ ފެކަލްޓީ އޮފް ޝަރީޢާ އިންނެވެ. އެއަށްފަހު މާސްޓަރއާއި ޑޮކްޓަރޭޓް ޙާޞިލްކުރެއްވީ މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީންނެވެ. ޑރ. ޝަހީމް ތަޢުލީމު ޙާޞިލްކުރެއްވި މި ދެ ޔުނިވަރސިޓީން އެތަންތަނުގެ އިސްދަރިވަރުންނަށް އަރުވާ އެންމެ މަތީ ޝަރަފްވެރި އެވޯޑް ޑރ ޝަހީމަށް ވަނީ އަރުވާފައެވެ.

މި ތަޤުރީރު އަޑު އެއްސެވުމަށް މަދީނާ އިސްލާމިކް ޔުނިވަރސިޓީގެ ވެރިންނާއި ގިނަ ޢަދަދެއްގެ ދަރިވަރުން ޙާޒިރުވިއެވެ. މިއީ މަދީނާ އިސްލާމިކް ޔުނިވަރސިޓީގައި ދިވެއްސަކު ތަޤުރީރުކުރި ފުރަތަމަ ފަހަރެވެ.