ގެއްލުނު ޖަންބޯ ދޯނިން ދަތުރު ކުރި 2 މީހުން ކަނޑުމަތިން ފެނިއްޖެއެވެ.

ކ.ގާފަރުން ފުރައިގެން ބ.ދަރަވަންދޫއަށް ދަތުރުކުރި "ޖަންބޯ" ނަމަކަށް ކިޔާ ދޯންޏެއްގެ ޚަބަރެއް ނުވެގެން އެދޯނި ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ފެށީ އިއްޔެއެވެ. ހިލަވެލި ބަރުކޮށްގެން ދަތުރުކުރި މި ދޯނީގައި 2 މީހުން ތިބިކަމަށްވެސް އެމްއެންޑީއެފުން ރޭ ބުނެފައިވެއެވެ.

އެމްއެންޑީއެފުން ދެންމެ ބުނީ ދޯނިން ދަތުރުކުރި މީހުން ސްޕީޑް ލޯންޗަކަށް ފެނިފައިވާކަމަށް މަޢުލޫމާތު ލިބިފައިވާ ކަމަށެވެ. އަދި އެމީހުންގެ ޙާލު ރަނގަޅުކަމަށްވެސް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފުން ރޭ ބުނީ މި ދޯނީގެ ޚަބަރެއް އެންމެފަހުން ވެފައިވަނީ އިއްޔެ މެންދުރު 11:35 ހާއިރުކަމަށެވެ.

"ޖަންބޯ" ދޯންޏަކީ ދިގުމިނުގައި 65 ފޫޓު ހުންނަ ދޯންޏެއްކަމަށާއި މި ދޯނި ފުރިފަހުން ޚަބަރެއް ނުވެގެން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) ރިޕޯޓްކޮށްފައި ވަނީ އިއްޔެ އިރުއޮއްސި 6:03 ހާއިރުކަމަށްވެސް އެމްއެންޑީއެފުން ބުނެއެވެ.

އެމްއެންޑީއެފުން ބުނީ ދޯނި ހޯދުމުގެ މަސައްކަތް ކުރަމުންދާ ކަމަށެވެ.