ޖަންބޯ ދޯނި ދިޔައީ އަޑިއަށް ކަމަށް އެމްއެންޑީއެފުން ހާމަކޮށްފިއެވެ.

އެމްއެންޑީއެފުން މިއަދު ބުނީ، ޖަންބޯ ދޯނިން ދަތުރުކުރި ދެމީހުން ކަނޑުވެފައި ތިއްބާ މިއަދު އެމީހުން ކަނޑުމަތިން ސަލާމަތް ކޮށްފައިވާ ކަމަށެވެ. ކަނޑުމަތިން ނެގި މީހުން ވަނީ ގެއްލުނު ޖަންބޯ ދޯނި އަޑިއަށް ގޮސްފައިވާކަމަށް އެމީހުންނެގި ލޯންޗުގެ ކެޕްޓަނަށް މަޢުލޫމާތު ދީފައި ކަމަށް އެމްއެންޑީއެފުން މަޢުލޫމާތުދެއެވެ.

ދޯނިން ދަތުރުކުރި މީހުންގެ ޙާލު ރަނގަޅުކަމަށްވެސް އެމްއެންޑީއެފުން މަޢުލޫމާތުދެއެވެ. އެމްއެންޑީއެފުން ބުނީ، ލޯންޗުންނެގި މީހުން މިހާރު އެހެން ދޯންޏެއްގައި ދަނީ މާލެއަށް ދަތުރުކުރަމުން ކަމަށެވެ.

'އިތުރު ތަފްޞީލްތައް ލިބޭނީ ހަވީރު 16:30 ހާއިރު މިމީހުން މާލެ އައުމުން.' އެމްއެންޑީއެފުން ބުނެފައިވެއެވެ.

ގެއްލުނު ޖަންބޯ ދޯނި ހޯދުމުގެ މަސައްކަތުގައި ރެއިން ފެށިގެން އެމްއެންޑީއެފް ކޯސްޓްގާޑް ނޫރައްދީން ލޯންްޗް ދިޔައީ ހަރަކާތްތެރިވަމުންނެވެ. މީގެ އިތުރުން މިއަދު ހެނދުނު އެމްއެންޑީއެފް ޑޯނިއަރ އެއަރކްރާފްޓް ވެސް ވަނީ މި ދޯނި ހޯދުމުގެ މަސައްކަތުގައި ހަރަކާތްތެރިވެފައެވެ.

ގާފަރުން ފުރައިގެން ބ.ދަރަވަންދޫއަށް ދަތުރުކުރި "ޖަންބޯ" ދޯނީގެ ޚަބަރެއް ނުވެގެން އެދޯނި ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ފެށީ އިއްޔެއެވެ. ހިލަވެލި ބަރުކޮށްގެން ދަތުރުކުރި މި ދޯނީގައި 2 މީހުން ތިބިކަމަށްވެސް އެމްއެންޑީއެފުން ރޭ ބުނެފައިވެއެވެ.

އެމްއެންޑީއެފުން ރޭ ބުނީ މި ދޯނީގެ ޚަބަރެއް އެންމެފަހުން ވެފައިވަނީ އިއްޔެ މެންދުރު 11:35 ހާއިރުކަމަށެވެ.

"ޖަންބޯ" ދޯންޏަކީ ދިގުމިނުގައި 65 ފޫޓު ހުންނަ ދޯންޏެއްކަމަށާއި މި ދޯނި ފުރިފަހުން ޚަބަރެއް ނުވެގެން އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) ރިޕޯޓްކޮށްފައި ވަނީ އިއްޔެ އިރުއޮއްސި 6:03 ހާއިރުކަމަށްވެސް އެމްއެންޑީއެފުން ބުނެއެވެ.