ރައީސް ޔާމީންގެ މައްޗަށް ކޮށްފައިވާ 11 އަހަރުގެ ޖަލު ޙުކުމުގައި ދަޢުލަތަށް 53 މިލިއަން ރުފިޔާ ދެއްކުމަށް އަމުރުކޮށްފައި ނެތުމުން އެކަން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުގެ ހުއްދައަކަށް ދައުލަތުން އެދިއްޖެއެވެ.

ވ. އާރަށް ކުއްޔަށް ދިނުމުގެ މުޢާމަލާތާއި ގުޅިގެން ކުރީގެ ރައީސް ޔާމީން ޢަބްދުލް ޤައްޔޫމްގެ މައްޗަށް ސާބިތުވި ރިޝްވަތާއި މަނީ ލޯންޑަރިންގެ ކުށުގައި ހިމެނޭ 3،413،230 ޑޮލަރު ނުވަތަ 53 މިލިއަން ރުފިޔާ ހަ މަސް ދުވަހުގެ ތެރޭގައި ދައްކަން ކްރިމިނަލް ކޯޓުން ވަކިން ނެރެފައިވާ އަމުރު ހައިކޯޓުން މިހާރުވަނީ ބާތިލްކޮށްފައެވެ.

53 މިލިއަން ރުފިޔާގެ މައްސަލާގައި ހައިކޯޓުން ނިންމާފައިވަނީ، ދައުލަތުން އެދިފައިވާކަމެއް މައުޟޫއީ މައްސަލައިގެ ޤަޟިއްޔާގެ ނިންމުމުގައި ހިމަނާފައިނުވާނަމަ، އެކަމަށް އަދުލުގެ ނިޒާމުގައި އޮންނަ ހައްލަކީ އިސްތިއުނާފު ކުރުންކަމަށެވެ. އާރަށުގެ މައްސަލަ ކޯޓަށް ހުށަހެޅިއިރު ދައުލަތުން އެދިފައިވަނީ ރައީސް ޔާމީން ލޯންޑާކުރިކަމަށް ސާބިތުވާ އެއް މިލިއަން ޑޮލަރާއި، އެއާ އެއްކޮށް އިންވެސްޓްކުރި އިތުރު 2.4 މިލިއަން ޑޮލަރާއި އަދި އެ ފައިސާ އިންވެސްޓްކޮށްގެން ލިބުނު ފައިދާ ދައުލަތަށް ނެގުމަށެވެ.

އެހެންކަމުން މިދިޔަ ހަފްތާގައި ޕީޖީ އޮފީހުން ވަނީ ހައިކޯޓަށް ސިޓީއެއް ހުށައަޅާފައެވެ. ހައިކޯޓަށް ހުށައެޅި ސިޓީގައި ޕީޖީން ބުނެފައިވަނީ ދަށު ކޯޓުގައި އެ މައްސަލަ ކުރިއަށް ދިޔައިރު ފައިސާ ނަގައިދޭން އެދުނުކަމަށާއި، ދަށު ކޯޓުގެ ޙުކުމުގައި ފައިސާގެ ވާހަކަ ހިމަނާފައި ނެތުމުން، އެކަން ވީގޮތް ސާފު ކުރުމަށް ދަށު ކޯޓަށް ސިޓީވެސް ހުށައެޅިކަމަށެވެ. އޭގެއިތުރުން ޕީޖީ އޮފީހުން މިހާރު ވަނީ ކްރިމިނަލް ކޯޓުގެ ނިންމުމުގެ އިސްތިއުނާފު ބަލައިގަތުމަށް ހައިކޯޓުގެ ހުއްދައަކަށް އެދިފައެވެ.

53 މިލިއަން ރުފިޔާގެ އަމުރުގެ މައްސަލާގައި ހައިކޯޓުގެ ފަނޑިޔާރުންގެ އިއްތިފާޤުން އިއްވި ހުކުމުގައި ބުނެފައިވަނީ ދަށު ކޯޓަށް ހުށަހެޅި މައްސަލައިގައި ފައިސާ ނަގައިދިނުމަށް އެދިފައި ވަނިކޮށް، އެކަމަށް ރިޢާޔަތް ކުރުމެއް ނެތި ހުކުމް ކުރުމަށްފަހު، އޭގެ 41 ދުވަސް ފަހުން ހަމަ އެ ކޯޓަށް އެ މައްސަލައާ ގުޅޭ އަމުރެއް ނެރެދިނުމަށް އެދެވޭނެ ޤާނޫނީ ހުއްޖަތެއް ޕީޖީއަށް ދެއްކިފައިނުވާ ކަމަށާއި، އަދި އެފަދަ އަމުރެއް ނެރުމުގެ ބާރުވެސް ކްރިމިނަލް ކޯޓަށް ލިބިގެން ނުވާ ކަމަށެވެ.

އަދި އެއީ ނެޗުރަލް ޖަސްޓިސްގެ ހަމަތަކަށް ބަލާއިރުވެސް ކުރެވޭނެ ކަމެއް ނޫން ކަމަށް ހުކުމުގައި ބުނެފައިވެއެވެ. ހައިކޯޓުން ބުނެފައިވަނީ ކޯޓަކުން ނިންމާ ނިންމުމަކީ އެންމެ ފައިނަލް ނިންމުން ކަމަށާއި އެއީ އެ މަރުޙަލާގެ އެންމެ ފަހުގެ ނިންމުން ކަމަށެވެ. އަދި ނިންމުމެއް ނިންމުމަށްފަހު ޢިމްލާކުށެއް އިސްލާޙުކުރުމަށް ނޫންގޮތަށް ޙުކުމަށް ބަދަލުނުގެނެވޭނެ ކަމަށް ހައިކޯޓުން ވަނީ ބުނެފައެވެ.

ހައި ކޯޓުގެ ހުކުމުގައި ވަނީ ޖިނާއީ އިޖްރައާތުގެ ގާނޫނު އޮތްގޮތުން ކުށްކޮށްގެން ހޯދާ މުދަލާއި ފައިސާ ދައުލަތަށް ނަގަން އަމުރު ކުރެވޭނީ ހުކުމް ކުރާ ވަގުތާއި އަދި ފަހުން ފެންނަ މުދަލާއި ފައިސާއެއް ނަމަ ފަހުން ނެރޭ އަމުރެއްގެ ދަށުން ކަމަށެވެ. އަދި މި މައްސަލާގައި ދައުލަތުންވަނީ ކޯޓުގެ ބޭނުން ނަހަމަ ގޮތުގައި ހިފުމަށް މަސައްކަތްކޮށްފައި ކަމަށާއި ކްރިމިނަލް ކޯޓުންވެސް މިމައްސަލާގައި އަމަލު ކޮށްފައިވަނީ ތަފާތުކޮށްކަމަށް ހައިކޯޓުގެ ޙުކުމުގައިވެއެވެ.

އެހެންކަމުން، ކްރިމިނަލް ކޯޓުން ކުރި އަމުރަކީ ބާތިލު އަމުރެއްގެ ގޮތުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމެވި އެވެ.

އާރަށުގެ މައްސަލައިގައި ރައީސް ޔާމީނަށް ކޮށްފައިވާ މަނީ ލޯންޑަރިންގ ގެ ކުށުގެ ދައުވާގައި ރައީސް ޔާމީން 7 އަހަރަށް ޖަލަށް ލުމާއެކު، 5 މިލިއަން ޑޮލަރުން ޖޫރިމަނާ ކުރުމަށް ކޯޓުންވަނީ ޙުކުމް ކޮށްފައެވެ. އަދި ރައީސް ޔާމީނުގެ މައްޗަށް ކޮށްފައިވާ ރިޝްވަތު ޤަބޫލު ކުރުމުގެ ކުށުގެ ދައުވާ ސާބިތުވެފައިވާކަަމަށް ކަނޑައަޅުއްވައި، 4 އަހަރުގެ ޖަލު ޙުކުމެއްވެސް ވަނީ އިއްވާފައެވެ.

މީގެކުރިން ގއ. ވޮޑަމުލާ ކުއްޔަށްދިން މައްސަލާގައި ވެސް ރައީސް ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވައި ފަސް މިލިއަން ޑޮލަރުންވަނީ ޖޫރިމަނާކޮށްފައެވެ. އެހެންނަމަވެސް އެ ހުކުމް ސުޕްރީމް ކޯޓުން ފަހުން ވަނީ ބާތިލްކޮށްފައެވެ.