ސްޓޭޓް ޓްރޭޑިން އޮގަނައިޒޭޝަން، އެސްޓީއޯގެ އަހަރީ އާންމު ޖަލްސާ މިމަހުގެ 31 ގައި ބޭއްވުމަށް ނިންމައި އެކަން އިޢުލާނުކޮށްފިއެވެ.

އެސްޓީއޯއިން ބުނީ، އަހަރީ އާންމު ޖަލްސާ ބޭއްވުމަށް ހަމަޖެހިފައިވަނީ މިމަހުގެ 31 ވަނަ ދުވަހުގެ ރޭގަނޑު 8:30 ގައި، ހުޅުމާލެ ސެންޓްރަލް ޕާކުގައި ކަމަށެވެ. އަދި އޮންލައިންކޮށް، މައިކްރޮސޮފްޓް ޓީމްސް ލައިވް މެދުވެރިކޮށް ޖަލްސާގައި ބައިވެރިވެވޭނެ ކަމަށް އެސްޓީއޯއިން ހާމަކޮށްފައިވެއެވެ.

އަހަރީ އާންމު ޖަލްސާގައި ބައިވެރިވެވޭނީ މި އަހަރުގެ އޭޕްރިލް 24 ވަނަ ދުވަހުގެ ނިޔަލަށް ހިއްސާދާރުންގެ ދަފުތަރުގައި ހިމެނޭ ފަރާތްތަކަށެވެ. އެސްޓީއޯއިން ވަނީ އެކުންފުނީގެ ހުރިހާ ހިއްސާދާރުންނަށް ޖަލްސާގައި ބައިވެރިވުމުގެ ދައުވަތު އަރުވާފައެވެ.

އަހަރީ އާންމު ޖަލްސާގައި މިދިޔަ އަހަރު އެކުންފުންޏަށް ލިބުނު ފައިދާއިން ހިއްސާދާރުންނަށް ބަހަން ނިންމާފައިވާ ޢަދަދު ހުށަހަޅައި ފާސް ކުރުން އޮންނާނެ ކަމަށް އެސްޓީއޯއިން މަޢުލޫމާތުދެއެވެ. އަދި އެ ޖަލްސާގައި މިއަހަރަށް އެ ކުންފުނީގެ ޑިރެކްޓަރުންގެ ބޯޑު އެކުލަވާލުމަށް ނަންތައް ފާސްކޮށް އާންމުންގެ ތެރެއިން ޑިރެކްޓަރުންގެ ބޯޑަށް މީހަކު އައްޔަން ކުރުމަށް ފާސް ކުރާނެ އެވެ.

އެސްޓީއޯއިން ބުނީ 2022 ވަނަ އަހަރުގެ އަހަރީ އާންމު ޖަލްސާގައި ހިއްސާގެ ފައިދާގެ ގޮތުގައި ހިއްސާއަކަށް 77 ރުފިޔާ ބަހަން ހުށަހެޅުމަށް އެސްޓީއޯގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ. މިދިޔަ އަހަރު އެސްޓީއޯއިން ބަހާފައިވަނީ ހިއްސާއަކަށް 65 ރުފިޔާއެވެ.

އެސްޓީއޯގެ 2022ވަނަ އަހަރުގެ ވަގުތީ މާލީބަޔާނަށް ބަލާއިރު، މިދިޔަ އަހަރު އެސްޓީއޯ އަށް 18.2 ބިލިއަން ރުފިޔާގެ އާމްދަނީއެއް ލިބިފައިވާއިރު، ސާފު ފައިދާގެ ގޮތުގައި ލިބިފައިވަނީ 742.21 މިލިއަން ރުފިޔާ އެވެ.