ރާއްޖެއަށް ވަގަށް ރަންތަކެއް އެތެރެކުރި މީހަކު 60000 ރުފިޔާއިން ޖޫރިމަނާ ކޮށްފިއެވެ.

ރާއްޖެ އައިއިރު ދިރުވާލައިގެން ރާއްޖެއަށް ރަން އެތެރެކޮށްފައިވާތީ ކަސްޓަމް ގާނޫނުގެ ދަށުން އިންޑިއާގެ ޕަރަންމަލް ޕުތިޔާ ޕުރައިލްގެ މައްޗަށް އުފުލާފައިވާ ސިއްރުން މުދާ އެތެރެކުރުމުގެ ދައުވާއަށް އޭނާ ވަނީ އިއުތިރާފްވެފައެވެ.

އެ ކުށުގެ އަދަބަކީ ސިއްރުން އެތެރެ ކުރި މުދާ ދަޢުލަތަށް ނެގުމަށްފަހު ހަމަހާއި ދެ އަހަރާއި ދެމެދުގެ މުއްދަތަކަށް ޖަލަށް ލުމެވެ. ނުވަތަ 10،000ރ. އާއި 240،000ރ. އާ ދެމެދުގެ އަދަދަކުން ޖޫރިމަނާ ކުރުމެވެ.

އޭނާގެ މައްޗަށް ކޮށްފައިވާ ދައުވާގައި ބުނެފައިވަނީ އޭނާގެ ހަށިގަނޑު ތެރޭގައި ކޮންމެވެސް އެއްޗެއް ފޮރުވާފައި ހުރިކަމަށް ޝައްކު ކުރެވިގެން އައިޖީއެމްއެޗަށް ގެންގޮސް ސްކޭން ކޮށްފައިވާ ކަމަށެވެ. އަދި ހަށިގަނޑު ތެރޭގައި 'ފޮރިން ބޮޑީސް' ހުރި ކަމަށް ޝައްކު ކުރެވިގެން އެޑްމިޓްކުރިއެވެ.

އޭނާ ބޮޑުކަމު ދިޔައިރު ބޭރުވި ދެ ބްލެޓްގެ ބަރުދަނުގައި 361 ގްރާމް ހުރިއިރު އޭނާ ވަނީ އިއުތިރާފްގެ އެއްބަސްވުމެއް ހަދާފައެވެ.

އެމައްސަލާގައި ޤާޟީ އަލީ އާދަމް ކުރެއްވި ޙުކުމްގައިވަނީ ކަސްޓަމްސް ޤާނޫނުގެ ދަށުން ރާއްޖެއަށް ސިއްރުން މުދާ އެތެރެކުރަން އުޅުމުގެ ކުށް ޕަރަންމަލް ޕުތިޔާ ޕުރައިލްގެ މައްޗަށް ސާބިތުވާކަމަށެވެ. އެގޮތުން އަދަބެއްގެ ގޮތުން 60،000 ރުފިޔާއިން ޖޫރިމަނާކޮށް އެ ފައިސާ 3 މަސްދުވަހުގެ ތެރޭގައި މީރާއަށް ދެއްކުމަށް އަމުރުކޮށްފައިވެއެވެ.

އަދި އޭނާ އެތެރެކުރި ރަންތައް ދައުލަތަށް ނަގާފައި ވަނީ ކަސްޓަމް ގާނޫނުގެ 97 ވަނަ މާއްދާގެ (ރ) އަށް ހަވާލާދިނުމަށް ފަހު އެވެ.