ދިވެހި އަސްކަރިއްޔާއަށް 35 އަހަރު ޚިދުމަތް ކުރެއްވުމަށްފަހު، ބްރިގޭޑިއާ ޖެނެރަލް އަބްދުލްމަތީން އަސްކަރީ ޚިދުމަތުން ރިޓަޔާ ކުރައްވައިފިއެވެ.

ބްރިގޭޑިއާ ޖެނެރަލް އަބްދުލްމަތީންގެ ޚިދުމަތުގެ އަގު ވަޒަންކުރުމަށް ބަންޑާރަކޮށީގައި ރޭ ބޭއްވި ހާއްސަ ރަސްމިއްޔާތެއްގައި ދިފާޢީ ވަޒީރު މާރިޔާ އަޙްމަދު ދީދީވަނީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ރައީސް އިބްރާހީމް މުހައްމަދު ޞާލިޙްގެ ޚާއްސަ ސިޓީފުޅާއި މެޑަލް ބޯޑު، މަތީން އާއި ހަވާލުކޮށްދެއްވާފައެވެ.

ބްރިގޭޑިއާ ޖެނެރަލް އަބްދުލްމަތީނަށް ވަނީ 11 މެޑެއްޔާއި 12 ކުލަ ލިބިވަޑައިގެންފައެވެ.

@MNDF_Official bids farewell to Brigadier General Abdul Matheen Ahmed as he retires honorably after 35 years of distinguished military service to our nation. pic.twitter.com/97Y6e99ftI

— Maj. Gen. Abdulla Shamaal (@CDFofMNDF) May 22, 2023

1987 ވަނަ އަހަރުގެ ޖުލައި މަހުގެ 01 ވަނަ ދުވަހު ދިވެހި އަސްކަރިއްޔާ އާއި ގުޅިވަޑައިގެންނެވި މަތީން ވަނީ، ސިފައިންގެ ތަފާތު އެކި ދާއިރާތަކުގައި އަގުހުރި ހިދުމަތްތަކެއް ކުރައްވައިފައެވެ. އެގޮތުން އެންމެ ގިނަ ދުވަހު ހިދުމަތްކޮށްދެއްވާފައި ވަނީ ދިފާއީ ވުޒާރާގެ އިދާރީ އަދި ހިންގުމުގެ ދާއިރާގައި ކަމަށް ދިވެހި އަސްކަރިއްޔާއިން މަޢުލޫމާތު ދެއްވައެވެ.

ސިފައިންގެ ހިދުމަތުން ޝަރަފުވެރިކަމާއެކު ރިޓަޔަރކުރެއްވިއިރު މަތީން ހުންނެވީ މިލިޓަރީ ސެކްރެޓަރީ ޓު ދަ މިނިސްޓަރ އޮފް ޑިފެންސްގެ މަގާމުގައެވެ.

ބްރިގޭޑިއަރ ޖެނެރަލް އަބްދުލް މަތީން އަހްމަދު ސިފައިންގެ ހިދުމަތުން ޝަރަފުވެރިކަމާއެކު ރިޓަޔަރ ކުރެއްވުމާ ގުޅިގެން ބޭއްވި ރަސްމިއްޔާތުގައި އެމްއެންޑީއެފްގެ ޖެނެރަލް އޮފިސަރުންނާއި، ޔުނިޓުތަކުގެ ކޮމާންޑަރުން ބައިވެރިވެ ވަޑައިގެންނެވި ކަމަށް ދިވެހި އަސްކަރިއްޔާއިން މަޢުލޫމާތު ދެއެވެ.