އައްޑޫ ސިޓީ މަރަދޫފޭދޫގައި ތޫނުއެއްޗަކުން ޙަމަލާދީ ޒުވާނަކު މަރާލި މައްސަލާގައި އޭނާގެ ކޮއްކޮ ހައްޔަރުކޮށްފިއެވެ.

ފުލުހުންގެ ޚިދުމަތުން ބުނީ އައްޑޫ ސިޓީ މަރަދޫ ފޭދޫ ގެއެއްގައި ތޫނު އެއްޗަކުން މީހަކަށް ހަމަލާ ދީފައިވާ ކަމަށް ރޭ 23:38 އެހައިކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

މި ހާދިސާގައި އަނިޔާވި 27 އަހަރުގެ ދިވެހި ފިރިހެނަކަށް އައްޑޫ އެކްއެޓޯރިއަލް ހޮސްޕިޓަލްގައި ފަރުވާ ދެމުން ދަނިކޮށް މަރުވެފައިވާކަމަށް ހޮސްޕިޓަލުން މައުލޫމާތު ދީފައިވާ ކަމަށް ފުލުހުން ބުނެއެވެ.

ފުލުހުން ބުނީ މައްސަލައިގެ ތުހުމަތުގައި 25 އަހަރުގެ ފިރިހެން މީހާ ހައްޔަރުކުރީ، އަމިއްލައަށް ފުލުހުންގެ އިދާރާއަށް ހާޒިރުވުމުން ކޯޓު އަމުރެއްގެ ދަށުން ކަމަށެވެ.

މި ހާދިސާގައި މަރުވި ޒުވާނާއަށް ހަމަލާ ދިނީ އޭނާގެ ކޮއްކޮ ކަމަށް މައުލޫމާތު ލިބެއެެވެ. ކޮއްކޮ ބޭބެއަށް ޙަމަލާދީފައިވަނީ މަސްތުވާތަކެތީގެ މައްސަލައެއްގައި ދެބެންގެ މެދުގައި ހިނގި ދެބަސްވުމެއް ހޫނުވެގެން ކަމަށް އެނގިފައިވެއެވެ.

އެމައްސަލައިގައި ހިނގި ދެބަސްވުން ހޫނުވެ ކޮއްކޮ ވަނީ ބޭބެގެ ހަށިގަނޑުގެ އެތަންމިތަނަށް ޙަމަލާދީފައެވެ. ފުލުހުން ބުނީ މިމައްސަލަ ތަހުގީގް ކުރަމުންދާ ކަމަށެވެ.