އަމިއްލަ މަންމައަށް މަރުގެ އިންޒާރުދިން ދިވެއްސަކު ދެމަހަށް ޖަލަށް ލުމަށް އައްޑޫސިޓީ މީދޫ މެޖިސްޓްރޭޓް ކޯޓުން ހުކުމްކޮށްފި އެވެ.

އެމީހާ އޭނާގެ މަންމައަށް މަރުގެ އިންޒާރު ދީފައިވަނީ މަސްތުވާތަކެތި ބޭނުން ނުކުރުމަށް މަންމަ ނަސޭޙަތްތެރި ވުމުންނެވެ. މި ޙާދިސާ ހިނގާފައިވަނީ މިދިޔަ އަހަރުގެ ޑިސެމްބަރު މަހުއެވެ.

މި މައްސަލާގައި މަންމައަށް އިންޒާރުދިން އަފްސަން ލަތީފް ޝަރީޢަތުގެ މަޖިލީހުގައި ވަނީ އެ ދައުވާއަށް އިންކާރު ކޮށްފައެވެ. އެހެން ކަމުން ދައުލަތުން ވަނީ ކުށް ސާބިތުކުރުމަށް ހެކިން ހުށަހަޅާފައެވެ.

މި މައްސަލައިގައި އަފްސަންގެ މަންމައާއި، ދައްތަ އަދި ބޮޑުބޭބެވެސް އޭނާއާ ދެކޮޅަށް ހެކިބަސް ދިނެވެ. ދަޢުލަތުން ހެކި ހުށައެޅުމުން އަފްސަން ބުނެފައިވަނީ އެއީ ހިނގާފައިވާ ކަމެއް ކަމަށާއި، އެދުވަހު މަންމައާ ދެބަސްވީއިރު އޭނާ ހުރީ މަސްތުގެ ހާލަތުގައި ކަމަށެވެ. އެހެންކަމުން ބުނެވުނު އެއްޗެއް ނޭނގޭ ކަމަށް އޭނާވަނީ ޝަރީޢަތުގެ މަޖިލީހުގެ މަޖިލީހުގައި ބުނެފައެވެ.

ދިފާއުގައި އަފްސަން އެއްވެސް ހެއްކެއް ހުށަހަޅާފައެއް ނުވެއެވެ. އެހެންނަމަވެސް ލުއި އަދަބެއް ދިނުމަށް އޭނާ ޝަރީއަތުގައި އެދުނެވެ.

މި މައްސަލާގައި ކޮށްފައިވާ ޙުކުމުގައި ވަނީ އަފްސަންގެ މައްޗަށް އަނިޔާއެއް ދީފާނެކަމުގެ ބިރުދެއްކުމުގެ ކުށުގެ ދައުވާ އެކަށީގެންވާ ޝައްކެއްނެތް މިންވަރަށް ސާބިތުވާ ކަމަށެވެ. އަދި މިކުށުގެ އުގޫބާތެއްގެ ގޮތުން އޭނާ 2 މަހާއި 3 ދުވަހުގެ މުއްދަތަށް ޖަލަށްލުމަށް މިމަހުގެ 14 ވަނަ ދުވަހު ކޯޓުން ވަނީ ހުކުމްކޮށްފައެވެ.