މާލޭ ގެއެއްގެ ތެރޭގައި 3 ދިވެހި ފިރިހެނުން ރަހީނުކުރި މައްސަލާގައި ހައްޔަރުކުރި މީހާގެ ބަންދަށް 15 ދުވަސް ޖަހައިފި އެވެ.

އެމީހުން ރަހީނުކޮށް އަނިޔާކުރި މައްސަލައާއި ގުޅިގެން ދިވެހި ފިރިހެނަކާއި 18 އަހަރުން ދަށުގެ ފިރިހެން ކުއްޖަކު ފުލުހުންގެ ބެލުމުގެ ދަށަށް ގެންގޮސްފައިވެއެވެ.

ފުލުހުން ބުނީ، މި މައްސަލާގައި ހައްޔަރުކުރި މީހުންގެ ތެރެއިން ކުޑަ ކުއްޖާ، އެކުއްޖާގެ އާއިލާއާ ހަވާލުކޮށްފައިވާ ކަމަށާއި، ދެން ހައްޔަރުކުރި މީހާގެ ބަންދަށް 15 ދުވަސް ކްރިމިނަލް ކޯޓުން ދީފައިވާ ކަމަށެވެ.

މަޢުލޫމާތު ލިބިފައިވާ ގޮތުގައި ތިން މީހުން ރަހީނުކޮށްފައި ހަތް ދުވަސް ވަންދެން ބައިތިއްބާފައިވާއިރު ކާން ދީފައިވަނީވެސް ދުވާލަކު އެންމެ ފަހަރަކުއެވެ.

ރަހީނުކޮށްފައި ތިބި 3 މީހުންނަށް އެކިވަރުގެ އަނިޔާ ކޮށްފައިވާ ކަމަށާއި، އެމީހުން ޑޮކްޓަރަށް ދެއްކުމަށް އައިޖީއެމްއެޗަށް ގެންގޮސްފައިވާ ކަމަށް ފުލުހުން މަޢުލޫމާތު ދިނެވެ. އައީޖީއެމްއެޗުން ބުނީ އެ ތިން މީހުންގެ ހާލުވެސް ރަނގަޅު ކަމަށާއި ތިން މީހުންވެސް ފަރުވާއަށްފަހު ހޮސްޕިޓަލުން ދޫކޮށްލާފައިވާ ކަމަށެވެ.

ފުލުހުން އިއްޔެ ބުނީ އެމީހުން ސަލާމަތް ކޮށްފައިވަނީ، ހެންވޭރު އަބަދަށް އުފާ މަގުގައި ހުރި ގެއެއްގެ ތެރޭގައި ރަހީނުކޮށްފައި ތިއްބައިކަމަށެވެ. ފުލުހުން އެގެއަށް ވަދެފައިވަނީ ބާރުގެ ބޭނުންކޮށްގެނެވެ.

ފުލުހުންބުނީ އެމައްސަލަ އިތުރަށް ތަޙުޤީޤު ކުރަމުންދާ ކަމަށެވެ.