ޕްރޮސިކިއުޓަރ ޖެނެރަލްގެ އޮފީހުގެ މުވައްޒަފުން ހަފްތާއަކު 4 ދުވަހު މަސައްކަތް ކުރަށްވާގޮތަށް ޕްރޮސިކިއުޓަރ ޖެނެރަލް ކަނޑައަޅުއްވައިފިއެވެ.

ޕީޖީ އޮފީހުން ބުނީ މި ގޮތަށް އަމަލުކުރުމަށް ނިންމާފައިވަނީ 25 ޖޫން 2023 އިން 04 އޮގަސްޓް 2023 ގެ ނިޔަލަށް ކަމަށެވެ.

މުވައްޒަފުން ހަފްތާއަކު 4 ދުވަހު މަސައްކަތަށް ނިކުތް ނަމަވެސް ޕީޖީ އޮފީހުންދޭ ޚިދުމަތްތައް ޢާންމު އުޞޫލުން ހަފްތާގެ 5 ދުވަހު ދެމުން ގެންދާނެ ކަމަށް އެ އޮފީހުން މަޢުލޫމާތުދެއެވެ. ހަފްތާގެ 5 ދުވަހުގެ ތެރެއިން 1 ދުވަސް މުވައްޒަފު އޮފީހަށް ނުނުކުތް ނަމަވެސް އޮފީހުގެ މަސައްކަތްތަކަށް ހުރަސް ނޭޅޭގޮތަށް މުވައްޒަފުންގެ މެދުގައި މަސައްކަތްތައް ބަހާލާފައިވާ ކަމަށްވެސް ޕީޖީ އޮފީހުން ވަނީ ބުނެފައެވެ.

ޕީޖީ އޮފީހުން ބުނީ "ހަތަރު ދުވަހުގެ މަސައްކަތު ހަފްތާ"ގެ މުއްދަތުގައި މުވައްޒަފުންގެ ޕާރފޯމަންސް ދުވަހުން ދުވަހަށް ބަލަމުންގޮސް، މި ތަޖުރިބާއަކީ ނާކާމިޔާބު ތަޖުރިބާއެއްނަމަ، މި ތަޖުރިބާ ހުއްޓާލައި ޢާންމު އުޞޫލުން 5 ދުވަހު މަސައްކަތްކުރާގޮތަށް އަލުން އިޢާދަކުރެވޭނެ ކަމަށެވެ.

ޕީޖީ އޮފީހުންވަނީ ފާއިތުވެދިޔަ ރަމަޟާންމަހުގެ ތެރޭގައި ހަތަރު ދުވަހުގެ މަސައްކަތު ހަފްތާގެ ފުރަތަމަ ފިޔަވައި ކާމިޔާބުކަމާއެކު ތަޖުރިބާކޮށްފައެވެ.