ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރު އަވަހާރަކޮށްލަން އުޅުނުކަމުގެ ތުހުމަތުގައި ހައްޔަރުކުރި މއ. ނައިޓްވިލާ، އުމުރުން 32 އަހަރުގެ އިބްރާހީމް އަބްދުﷲ (ގައްބަރޭ) ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފް ކޮށްފިއެވެ.

ގައްބަރޭއާއި ގުޅޭގޮތުން ހުށަހެޅި މިމައްސަލައާއި ގުޅިގެން އޭނާ ހޯދަން އިއުލާންކުރުމުން ގައްބަރޭ އަމިއްލައަށް ފުލުހުންނާއި ހަވާލުވީ މިދިޔަ މޭމަހުގެ 23 ވަނަ ދުވަހުއެވެ. އޭނާ ބަންދުކުރުމަށްފަހު އޭނާގެ ބަންދުގެ މުއްދަތު ކްރިމިނަލް ކޯޓުން ދިޔައީ އެކިފަހަރުމަތިން އިތުރުކުރަމުންނެވެ.

އިބްރާހީމް އަބްދުﷲގެ ބަންދުގެ މުއްދަތު މުރާޖައާކުރުމަށް ކްރިމިނަލް ކޯޓަށް ހާޒިރުކުރުމުން ޝަރުތުތަކާއެކު މިމަހުގެ 6ވަނަ ދުވަހު އޭނާ ދޫކޮށްލި މައްސަލަ މިމަހުގެ 9 ވަނަ ދުވަހު ހައިކޯޓުގައި އިސްތިއުނާފް ކޮށްފައިވާ ކަމަށް ޕީޖީ އޮފީހުން މިއަދު ވަނީ ބުނެފައެވެ.

ނުރައްކާތެރި ހަތިޔާރެއްގެ ގޮތުގައި ބެލެވިދާނެ އެއްޗެއް ބޭނުންކޮށްގެން މެންބަރު ޒަރީރަށް ހަމަލާދިން މައްސަލަ ފުލުހުންނަށް ހުށަހަޅާފައިވަނީ މޭމަހުގެ އެއްވަނަ ދުވަހުގެ ފަތިހު 5:08 ހާއިރުއެވެ. އެ މައްސަލައިގައި ގައްބަރޭގެ އިތުރުން އެހެން ތިން މީހަކުވެސް ހައްޔަރުކުރިއެވެ.

ގައްބަރޭއަކީ އެމްޑީޕީ ގައުމީ މަޖިލީހުގެ މައްޗަންގޮޅީ ދެކުނު ދާއިރާގެ ރައީސެވެ.