ނ. ހޮޅުދޫގައި ފާރެއް ވެއްޓި، ސީރިއަސް އަނިޔާތަކެއް ލިބުނު އާރުޑީސީގެ 3 މުވައްޒަފުންގެ ޙާލަތު ވަރަށްގާތުން ބަލަމުންދާކަމަށް އެކުންފުނިން ހާމަކޮށްފިއެވެ.

ހޮޅުދޫގެ މަގުތައް ޒަމާނީ ފެންވަރަށް ހެދުމުުގެ މަޝްރޫއުގައި މަސައްކަތް ކުރަމުންދިޔަ ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ)ގެ ދިވެހި ތިން މުވައްޒަފެއްގެ ގައިމައްޗަށް ފާރެއް ވެއްޓިފައި ވަނީ އިއްޔެ ހަވީރު 5:45 ހާއިރު އެވެ.

އާރުޑީސީން މިއަދު ބުނީ ހޮޅުދޫ މަގުހެދުމުގެ މަސައްކަތުގައި އުޅެނިކޮށް އަނިޔާވި އެކުންފުނީގެ މުވައްޒަފުންގެ ހާލު ވަރަށް ގާތުން ބަލަމުން އަންނަ ކަމަށާއި، އެމީހުންގެ ބޭސްފަރުވާއާއި އެހެނިހެން ހަރަދުތައްް ކުންފުނިން ހަމަޖައްސަމުން ގެންދާކަމަށެވެ.

ޒަހަމްވި ތިން މީހުނަށްވެސް ފުރަތަމަ ފަރުވާ ދީފައި ވަނީ އުނގޫފާރު ރީޖަނަލް ހޮސްޕިޓަލުގަ އެވެ. އޭގެ ތެރެއިން ދެމީހެއްގެ އިތުރުފަރުވާއަށް މާލެ ގެނައުމުގެ މަސައްކަތް މިހާރުދަނީ ކުރަމުންނެވެ.

ޑޮކްޓަރުންނާ ހަވާލާދީ އާރްޑީސީން އިއްޔެ ބުނީ އެންމެ ބޮޑަށް ޒަހަމްވި މީހާގެ ޅިނދުކަށިގަނޑުގެ ހަތަރު ތަނަކުން ރެނދުލާފައިވާ ކަމަށާއި އެކަކުގެ ވައަތުގެ ކަށިގަނޑެއް ބިންދައިގެން ގޮސްފައިވާ ކަމަށެވެ. އަދި އެކެއްގެ ބޯ ވަނީ ފަޅައިގެން ގޮސްފައެވެ.

އަނިޔާވި ތިން މީހުންނަކީ ވެސް ހޮޅުދޫ ތިން މީހުންނެވެ.