ޅ. ކުރެންދޫ އާއި ނައިފަރުގެ ބައެއް ހިސާބުތަކުގައި ފެންބޮޑުވެ ބައެއް ގެތަކަށް ފެން ވަދެއްޖެއެވެ.

އެމްއެންޑީއެފުން ބުނީ މިހާރު ކުރަމުންދާ ވިއްސާރައިގައި ބޯކޮށް ވާރޭވެހި ޅ. ކުރެންދޫގެ ބައެއް ސަރަހައްދުތަކުގައި ފެންބޮޑުވެ 6 ގެ އަކަށް ފެންވަނުމާއި ގުޅިގެން އެމްއެންޑީއެފް ނޮދާން އޭރިއާގެ ސިފައިން، ޕަމްޕް ބޭނުންކޮށްގެން ފެން ހިއްކުމުގެ މަސައްކަތް ފަށާފައިވާ ކަމަށެވެ. އެމްއެންޑީއެފަށް އެހާދިސާގެ ރިޕޯޓް ލިބިފައި ވަނީ މިއަދު ހަވީރު 4:17 ހާއިރު ކަމަށްވެސް އެމްއެންޑީއެފުން ބުނެއެވެ.

މީގެ އިތުރުން ޅ. ނައިފަރަށް ބޯކޮށްވާރޭވެހި އެރަށުގެ ބައެއް ސަރަޙައްދުތަކުގައި ފެންބޮޑުވެ 4 ގެޔަކަށް ފެން ވަނުމާއި ގުޅިގެން ފެން ހިއްކުމުގެ މަސައްކަތް އެމްއެންޑީއެފް ނޮދާން އޭރިއާގެ ސިފައިންނާއި، ނައިފަރު ފަޔަރ ސްޓޭޝަންގެ ސިފައިން ކުރަމުންދާކަމަށް އެމްއެންޑީއެފުން ވަނީ ބުނެފައެވެ. އެމްއެންޑީއެފަށް އެހާދިސާގެ ރިޕޯޓް ލިބިފައި ވަނީ މިއަދު ހަވީރު 18:53 ހާއިރު ކަމަށްވެސް އެމްއެންޑީއެފުން ބުނެއެވެ.

Lh.Kurendhoo ah boakoh vaarey vehi e rashuge baeh sarahadhu thakugai fen boduve, 6 geyakah fen vanumaai gulhigen fen hiykumah MNDF Northern Area ge sifain kuramundhaa masahkathuge therein. pic.twitter.com/xvMZZxFUed

— Maldives National Defence Force (@MNDF_Official) August 7, 2020

މެޓް އޮފީހުން މިއަދު ވަނީ ބޯކޮށް ވާރޭވެހޭނެ ކަމަށް ލަފާކޮށް ރާއްޖޭގެ އުތުރަށް ވައިޓް އެލާޓް ނެރެފައެވެ. އަދި މިރޭ ރާއްޖޭގެ އުތުރާއި މެދުރާއްޖެތެރޭގެ އެކި ހިސާބަށް ވިއްސާރަ ކުރުމާއެކު ގުގުރާނެއެވެ. އަދި ބައެއް ރައްތަކަށް ބޯކޮށް ވާރޭ ވެހުން އެކަށީގެންވާ ކަމަށާއި ދެކުނުގެ އަތޮޅުތަކަށް ކެރީގެ އަސަރު ކުރާނެ ކަމަށް އެ އިދާރާއިން ބުނެއެވެ.

މީގެ އިތުރުން ރާޅުގެ އުސްމިން ހުންނާނީ ފަސް ފޫޓާއި ހަތް ފޫޓުގައި ކަމަށާއި، ދިޔަވަރު ބޮޑުވާ ގަޑިތަކުގައި ދެކުނުގެ ބައެއް ރަށްތަކަށް އުދައެރުން އެކަށީގެންވާ ކަމަށާއި ދަތުރު ކުރުމުގައި ހުރިހައި ފަރާތްތަކުން، މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.