ދުނިޔޭގެ ވަރުގަދަ އެއް ބާރު ކަމަށްވާ ޗައިނާ އާއި އެކު ދިވެހި ރާއްޖެއިން ދިފާއީ ގުޅުން ބަދަހި ކުރަން މަޝްވަރާ ކޮށްފައިވާ ކަމަށް ރާއްޖޭގެ ދިފާއީ ވުޒާރާއިން ބުނެފިއެވެ.

ދިފާއީ ވުޒާރާއިން ބުނީ 11 ވަނަ ބެއިޖިން ޒިއަންޝަން ފޯރަމުގައި ބައިވެރިވެވަޑައިގަތުމަށް ދިފާައީ ވަޒީރު، މުހައްމަދު ޣައްސާން މައުމޫން ޗައިނާއަށް ކުރައްވަމުންދާ ދަތުރުފުޅުގެ ތެރެއިން ޗައިނާ އާއި އެކު ދިވެހި ރާއްޖެއިން ދިފާއީ ގުޅުން ބަދަހި ކުރަން މަޝްވަރާ ކޮށްފައިވާ ކަމަށެވެ.

ފޯރަމުގެ ހަވާސާގައި ޗައިނާގެ ނޭޝަނަލް ޑިފެންސް މިނިސްޓަރު އެޑްމިރަލް ޑޮންގް ޖޫންއާ އާއި ބައްދަލުކުރައްވައި ދެ ވަޒީރުން ވެސް ވަނީ ދެގައުމުގެ ދެމެދުގައި ސަލާމަތީ އަދި ދިފާއީ ގުޅުން އިތުރަށް ބަދަހި ކުރަން މަޝްވަރާކޮށްފައެވެ.

މި މަޝްވަރާތަކުގެ އިތުރު ތަފްސީލެއް ދިފާއީ ވުޒާރާއިން އަދި ހާމަކޮށްފައެއް ނުވެއެވެ.

މި ބައްދަލުވުމުގައި ދިފާއީ ވުޒާރާގެ ވަފުދުގެ އިތުރަށް ދިވެހިރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު ޑރ. ފަޒީލް ނަޖީބުވެސް ބައިވެރިވެވަޑައިގެންނެވިއެވެ.