ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރ ކުރިކަމުގެ ކުށް ސާބިތުވުމާ ގުޅިގެން ކުރީގެ ރައީސް ޔާމީން އަބްދުލްގައްޔޫމްގެ މައްޗަށް ކޮށްފައިވާ ހުކުމް ބާތިލުކޮށް، ކްރިމިނަލް ކޯޓުން އަލުން ބަލަން ފެށި މައްސަލައިގެ އަޑުއެހުމެއް މި ފެށޭ ހަފްތާގެ ހޯމަ ދުވަހަށް ތާވަލު ކޮށްފިއެވެ.

ކްރިމިނަލް ކޯޓުން އާންމުކޮށްފައިވާ ގޮތުން މި އަޑުއެހުން އޮންނާނީ ހޯމަ ދުވަހުގެ ހެނދުނު 9:00 ގައެވެ. އަދި މި އަޑުއެހުން ޔޫޓިއުބް މެދުވެރިކޮށް ވަގުތުން ދެއްކުމަށް ވެސް ވަނީ ހަމަޖެހިފައެވެ.

ޔާމީންގެ ޝަރީއަތް ލައިވްކުރަން ނިންމާފައިވާއިރު މިއީ އެންމެފަހުން މި މައްސަލާގައި މިދިޔަ މަހުގެ 21 ގައި ބޭއްވި އަޑުއެހުމުގައި ޔާމީންގެ ފަރާތުން އެދިވަޑައިގެންފައިވާ ކަމެކެވެ. އަދި އެކަމަށް ދައުލަތުގެ ފަރާތުން ވެސް އިއުތިރާޒު ކޮށްފައި ނުވާތީ ގާޒީ ވަނީ ލައިވްކޮށްގެން އަޑުއެހުންތައް ކުރިއަށް ގެންދަން ނިންމާފައެވެ.

އާރަށުގެ މައްސަލާގައި 2022 ވަނަ އަހަރުގެ ޑިސެންބަރު 25 ގައި ވަނީ ރިޝްވަތު ގަބޫލު ކުރުމުގެ ކުށުގެ އަދަބެއްގެ ގޮތުގައި 4 އަހަރު އަދި މަނީ ލޯންޑަރިންނާ ގުޅިގެން 7 އަހަރާއެކު 11 އަހަރުގެ ޖަލު ހުކުމެއް ޔާމީނަށް އިއްވާފައެވެ. އެ ހުކުމް ހައިކޯޓުން ބާތިލުކުރީ މި އަހަރުގެ އޭޕްރީލް މަހުއެވެ. އެ މައްސަލަ އަލުން ބަލަނީ ހައިކޯޓުން އެ ހުކުމް ބާތިލުކުރިއިރު އަލުން މައްސަލަ ބެލުމަށް ކްރިމިނަލް ކޯޓަށް އަމުރު ކޮށްފައިވާތީއެވެ.