ދިވެހިރާއްޖޭގެ ކުންފުނީގެ ބިލަށް ހުށައަޅާފައިވާ އިސްލާޙުތައް މަޖިލީހަށް ބަލައިގަނެ އިޤްތިޞާދީ ކޮމިޓީއަށް ފޮނުވައިފިއެވެ.

ރައްޔިތުންގެ މަޖިލީހުގެ ދައުރުން ބޭރުން މިއަދު ބޭއްވި ޖަލްސާގައި ކުރިޔަށް ގެންގޮސްފައިވަނީ މިމަހުގެ 11 ވަނަ ދުވަހު މަޖިލީހުގެ ދައުރުން ބޭއްވި ފުރަތަމަ ޖަލްސާގައި، ސަރުކާރުގެ ފަރާތުން ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ހުށަހެޅުއްވި ދިވެހިރާއްޖޭގެ ކުންފުނީގެ ގާނޫނަށް ހުށަހަޅާފައިވާ އިސްލާހުގެ ބިލުގެ އިބްތިދާއީ ބަހުސް އެވެ.

މިބިލުގެ އިބްތިދާއީ ބަހުސް ނިންމެވުމަށްފަހު ބިލު ބަލައިގަތުމަށް މަޖިލީހުގައި މިއަދު ނެގި ވޯޓުގައި 77 މެންބަރުންވަނީ ބިލު ބަލައިގަތުމަށް ފެނިވަޑައިގަންނަވާ ކަމަށް ވޯޓު ދެއްވާފައެވެ.

އެހެންކަމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް ވަނީ ބިލު ދިރާސާ ކުރުމަށް އިޤްތިޞާދީ ކޮމިޓީއަށް ފޮނުއްވާފައެވެ. އެއަށްފަހު މިއަދު ޖަލްސާ ވަނީ ނިންމަވާލައްވާފައެވެ.

ސަރުކާރުން ކުންފުނީގެ ޤާނޫނުގެ 100، 113 އަދި 126 ވަނަ މާއްދާއަށް ހުށައަޅާފައިވާ އިސްލާހުތަކުގައި ބުނެފައިވަނީ ކުންފުނީގެ ހާއްސަ ޢާންމު ޖަލްސާއެއް ބާއްވަން މެންބަރުން އެދެފިނަމަ އެކަމަށް އެދި ނޯޓިސް ލިބޭތާ 3 ދުވަހުގެ ތެރޭގައި ޖަލްސާގެ ދައުވަތު ދޭންވާނެ ކަމަށާއި އަދި 10 ދުވަހުގެ ތެރޭގައި ޖަލްސާ ބާއްވަންވާނެ ކަމަށެވެ. ކުންފުނީގެ ޤާނޫނުގައި މިހާރު އޮންނަނީ ނޯޓިސް ލިބޭތާ 3 މަސް ދުވަހުގެ ތެރޭގައި ޖަލްސާ ބޭއްވުމަށެވެ.

އޭގެއިތުރުން ކުންފުނީގެ ޑިރެކްޓަރުން އަދި މެނޭޖިން ޑިރެކްޓަރެއް ނެތްނަމަ ނުވަތަ އެކަން ރަޖިސްޓްރާގެ ސަމާލުކަމަށް އެއްވެސް ފަރާތަކުން ގެނެސްފިނަމަ ޑިރެކްޓަރުން އަދި މެނޭޖިން ޑިރެކްޓުން އައްޔަނު ކުރުމަށް ކުންފުންޏަށް އެންގުމުގެ ބާރު ރަޖިސްޓްރާއަށް ލިބިގެންވާ ކަމަށް އިސްލާހުގައި ބުނެފައިވެއެވެ. އަދި އެގޮތަށް އެންގުމުން 10 ދުވަހުގެ ތެރޭގައި ކުންފުންޏަށް ބޭނުންވާވަރަށް ޑިރެކްޓަރުން އަދި މެނޭޖިން ޑިރެކްޓަރު އައްޔަނުކޮށް އެކަން ރަޖިސްޓްރާއަށް ހުށަހަޅަންޖެހޭނެ ކަމަށްވެސް އިސްލާހުގައި ބުނެފައިވެއެވެ.

މިއަދުގެ ބަހުސްގައި މެންބަރުން ވަނީ އެ އިސްލާހަށް ތާއީދުކުރައްވައި ވާހަކަފުޅު ދައްކަވާފައެވެ. އަދި ސަރުކާރުން ކުންފުނިތަކުގެ ހިންގުމަށް ގެންނަމުންދާ ބަދަލުތަކަށް މެންމްބަރުންވަނީ ތަޢުރީފް ކުރަށްވާފައެވެ.