ހއ. ބާރަށު ޕޮލިސް ސްޓޭޝަންގައި މަސައްކަތްކުރާ ސިވިލް މުވައްޒަފެއްގެ ސައިކަލުގައި ރޯކޮށްލައިފި އެވެ.

ފުލުހުން ބުނެފައިވަނީ، ބާރަށު ގެއެއްގެ ކައިރީ ޕާކުކޮށްފައިވާ ސައިކަލެއްގައި ރޭ 03:00 އެހާކައްހާއިރު ރޯކޮށްލާފައިވާކަމުގެ މައްސަލައެއް ފުލުހުންނަށް ހުށައެޅިފައިވާ ކަމަށާއި، އެސައިކަލަކީ ބާރަށު ޕޮލިސް ސްޓޭޝަންގައި މަސައްކަތްކުރާ ސިވިލް މުވައްޒަފެއްގެ ސައިކަލު ކަމަށެވެ.

"ރަސް އޮންލައިނަށް" ލިބިފައިވާ ފޮޓޯއިން ފެންނަ ގޮތުގައި، ރޯކޮށްލި ސައިކަލަށް ވަނީ ވަރަށް ބޮޑަށް އަނދައި، ބޮޑެތި ގެއްލުންތަކެއް ލިބިފައެވެ. ފުލުހުން ބުނެފައިވަނީ، މިމައްސަލައާއި ގުޅިގެން އަދި އެއްވެސް މީހަކު ހައްޔަރުކޮށްފައި ނުވާކަމަށާއި، މިމައްސަލަ އިތުރަށް ތަޙްޤީގު ކުރަމުންދާކަމަށް ފުލުހުން ބުނެއެވެ.

ހއ. ބާރަށުގައި ވަނީ މި ޖޫން މަހުގެ 21 ވަނަ ދުވަހުވެސް ސައިކަލެއް ރޯކޮށްލާފައެވެ. އެފަހަރު ރޯކޮށްލީ ހއ.އަތޮޅު ކައުންސިލްގެ ނައިބް ރައީސްގެ ސައިކަލެވެ.

އޭގެ އިތުރުން މިދިޔަ ހަފްތާގައި ތިނަދޫ ޕޮލިސް ސްޓޭޝަންގައި މަސައްކަތް ކުރާ ފުލުހެއްގެ ސައިކަލްވެސް ވަނީ އަންދާލާފައެވެ. އެމައްސަލައިގައި މިހާރު ވަނީ ތިން މީހަކު ހައްޔަރު ކޮށްފައެވެ. އަދި އެމީހުންގެ ބަންދުގެ މުއްދަތު ވަނީ ކޯޓުން އިތުރު ކޮށްފައެވެ.