ރައްޔިތުންގެ މަޖިލީހުގެ ރައީސް ދިރިއުޅުއްވާ މުރައިދޫ ގޭގެ މުވައްޒަފުންގެ މައުލޫމާތު ހާމަނުކުރަން މަޖިލީހުގެ 241 ކޮމިޓީން މިއަދު ނިންމި ނިންމުން ބަދަލު ކުރުމަށް އެކޮމިޓީން ފާސްކޮށްފިއެވެ.

ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު ‘މުރައިދޫ’ ގޭގައި މަސައްކަތްކުރާ މުވައްޒަފުންގެ އެއްވެސް މައުލޫމާތެއް ހާމަނުކުރަން 241 ކޮމިޓީން މިއަދު ހެނދުނު ފާސްކުރީ ކޮމިޓީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ ތެރެއިން 5 މެންބަރުންގެ ވޯޓާ އެކުއެވެ. އެ މަޢުލޫމާތު ހާމަކުރުމަށް 4 މެންބަރަކު ވޯޓު ދެއްވިއެވެ.

ނަމަވެސް ކޮމިޓީގެ އެނިންމުން ބަދަލު ކުރުމަށް ރައީސް ޑރ. މުޢިއްޒު އެންގެވުމާ ގުޅިގެން މިއަދު ހަވީރު ބޭއްވި ކޮމިޓީ ބައްދަލުވުމުގައި ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ ފިޔަވައި އެހެން ހުރިހާ މެންބަރުންގެ ވޯޓު ދެއްވައިގެން ފާސްކުރެއްވީ މުރައިދޫ ގޭގައި މަސައްކަތްކުރާ މުވައްޒަފުންގެ ވަނަަވަރާއި އަދަދާއި އަދި އެކަމަށް ހޭދަވާ ފައިސާގެ އަދަދު ހާމަކުރުމަށެވެ.

އޭގެއިތުރުން އެ މައްސަލައިގައި ކޮމިޓީން ކުރިން ނިންމި ނިންމުން ބާތިލުކުރަން ވެސް ކޮމިޓީން ފާސްކުރި އެވެ.

މުރައިދޫގެއަކީ ރައްޔިތުންގެ މަޖިލީހުގެ ރައީސްގެ މަގާމުގައި ރައީސް މުޙައްމަދު ނަޝީދު ހުންނަވަނިކޮށް އެމަނިކުފާނަށް ދިން ބޮމުގެ ހަމަލާއަށްފަހު ދައުލަތުގެ ތިންބާރުގެ ވެރިންގެ ރައްކާތެރިކަން ކަށަވަރު ކޮށްދިނުމަށް 2021 ވަނަ އަހަރު ގެކޮޅު ހަމަޖައްސައިދިނުމަށް މަޖިލީހުން ނިންމުމާއި ގުޅިގެން ރައީސް ނަޝީދު ހުންނެވި ގެކޮޅެވެ.

20 ވަނަ މަޖިލީހުގެ ރައީސް ޢަބްދުއްރަޙީމް މުރައިދޫގެއަށް ބަދަލުވެވަޑައިގަތީ ޖުލައިމަހުގެ 26 ވަނަ ދުވަހުއެވެ.