މާލެ ސަރަހައްދުގައި ނުރައްކާތެރި ކެމިކަލް ގެންގުޅޭ 206 ތަނެއް އެބަހުރި ކަމަށް ޑިފެންސް މިނިސްޓްރީން ބުނެފި އެވެ.

ޑިފެންސް މިނިސްޓްރީން ވަނީ ކެމިކަލާ ބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހުރިތޯ ބެލުމަށް މާލެ އާއި ހުޅުމާލެ، ވިލިމާލޭގެ އިތުރުން ތިލަފުށީގައި ހާއްސަ އިންސްޕެކްޝަނެއް ކުރިއަށް ގެންގޮސްފަ އެވެ.

"އޮޕަރޭޝަން ހިރާސް ފާސް"ގެ ނަމުގައި އެ ޑިފެންސް މިނިސްޓްރީގެ ފަޔާ އެންޑް ރެސްކިޔު ސާވިސްއިން އޮޕަރޭޝަނެއް ފެށީ މި މަހު ފުރަތަމަ ދުވަހު އެވެ. އެ އޮޕަރޭޝަން ނިންމުމަށްފަހު ޑިފެންސް މިނިސްޓްރީން އާންމުކުރި މައުލޫމާތުގައި ބުނީ 15 ދުވަސް ތެރޭގައި، 399 އިމާރާތް ބަލައި ފާސް ކޮށްފައިވާ ކަމަށެވެ. އަދި ނުރައްކާތެރި ކެމިކަލް ގުދަންކުރާ 144 ތަނާއި ކެމިކަލް ވިއްކާ 62 ފިހާރައެއް ބަލާފައިވާ ކަމަށް އެ މިނިސްޓްރީން ބުންޏެވެ.

މިނިސްޓްރީން ހިންގި މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން ފަސޭހައިން އަލިފާން ރޯވާ ފަދަ ތަންތަނާއި އެ ތަންތަނުގައި ހުރި ނުރައްކާތައް ދެނެގަނެފައިވާ ކަމަށް އެ މިނިސްޓްރީން ބުންޏެވެ.

އެއްވެސް ބާވަތެއްގެ ކެމިކަލެއް މާލޭގެ އެއްވެސް ތަނެއްގައި ގުދަން ކުރުމަކީ މިހާރު މަނާ ކަމެކެވެ. އަދި ސަރުކާރުން ވަނީ އެކަމަށް ހުޅުމާލެއިން ބިމެއް ހަމަޖައްސާފައިކަން ފާހަގަ ކޮށްލެވެއެވެ.

ސަރުކާރުން މާލޭގައި ކެމިކަލް ގުދަންކުރުން މަނާކުރީ 2019 ވަނަ އަހަރުގެ ސެޕްޓެމްބަރު މަހުގެ 20 ވަނަ ދުވަހު ހ. ތިލަފުށިގޭގައި ހުރި ކެމިކަލް ގުދަނުގައި ރޯވެ ހިނގި އަލިފާނުގެ ނުރައްކާތެރި ހާދިސާ އަށް ފަހު އެވެ. އެ ހާދިސާގައި އެކަކު މަރުވެ، 400 އަށް ވުރެ ގިނަ މީހުން ވަގުތީ ބޯހިޔާވަހި ކަމަށް ބަދަލުކުރަން ޖެހުނެވެ. އަދި އެ ހާދިސާގައި ކެމިކަލް ރައްކާކުރާ ހަތަރު ގުދަނަކާއި މީހުން ދިރިއުޅޭ ހަ ގެއެއް އަނދާ ހުލިވި އެވެ.