އިލެކްޝަންސް ކޮމިޝަން ހިންގާނެ އިމާރާތެއް ހޯދަން ފަށައިފި އެވެ.

އިލެކްޝަންސް ކޮމިޝަންގެ މެމްބަރު ހަސަން ޒަކަރިއްޔާ "ރަސް"އަށް ވިދާޅުވީ އާ އިމާރާތެއް ހޯދަނީ އެ ކޮމިޝަން މިހާރު ހިންގަމުންދާ ޕޯޓް ކޮމްޕްލެކްސްގެ އިމާރާތް ހުސްކުރަން ޑިސެމްބަރު މަހަށް ނޯޓިސް ދީފައި އޮތުމުން ކަމަށެވެ.

ޒަކަރިއްޔާ ވިދާޅުވީ އެ އިމާރާތުގައި އެ ކޮމިޝަން ހިންގާތާ މިހާރު 20 ވަރަކަށް އަހަރު ވެދާނެ ކަމަށެވެ.

"އަޅުގަނޑުމެން ކުރިން ކޮމިޝަން ހިންގީ ޤުރުއާނާ ބެހޭ މަރުކަޒު ހުރިތަނުގައި. ނަމަވެސް އޭރު އެތާ އަލިފާނުގެ ހާދިސާއެއް ހިނގައިގެން ބަދަލުވިގޮތަށް މިތާ މި އުޅެނީ،" ޒަކަރިއްޔާ ވިދާޅުވި އެވެ.

ޒަކަރިއްޔާ ވިދާޅުވީ ހޯދަމުން ދަނީ 13،000 އަކަފޫޓުގެ އޮފީސް އިމާރާތެއް ކަމަށެވެ.

އޮފީސް ހިންގަން 10 އަހަރު ދުވަހަށް ކުއްޔަށް އިމާރާތެއް ހޯދަން އިއްޔެ އިލެކްޝަނުން އޮތީ އިއުލާންވެސްކޮށްފަ އެވެ.

އޭގެ ބީލަން މި މަހުގެ 28ގައި ހުޅުވަން ވަނީ ތާވަލުވެސްކޮށްފަ އެވެ.