އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް މަރުގެ އިންޒާރު ދިން މައްސަލައެއް ފެންމަތިވެއްޖެ އެވެ.

ފުލުހުން ބުނީ މިނިސްޓަރަށް މަރުގެ އިންޒާރު ދިން މައްސަލައެއް ސިޓީއަކުން އިއްޔެ ހުށަހަޅާފައިވާ ކަމަށެވެ. އަދި އެ މައްސަލަ ބަލަމުންދާ ކަމަށް ވެސް ފުލުހުން ބުނެފައި ވެއެވެ. އިތުރު ތަފްސީލެއް ނުދެއެވެ.

މިނިސްޓަރަށް މަރުގެ އިންޒާރު ދިން ކަމަށް ބުނާ މައްސަލައެއް ފެންމަތިވި އިރު ހަމާސްގެ ޗީފް ޔަހުޔާ ސިންވާރު ޝަހީދުކޮށްލި މައްސަލައިގައި ރާއްޖޭގެ މިސްކިތްތަކުގައި ކަށުނަމާދު ނުކުރާތީ ފާޑުކިއުން އޮތީ އަމާޒުވެފަ އެވެ.

ނަމަވެސް މިނިސްޓަރު ވިދާޅުވީ ޝަހީދުންގެ މައްޗަށް ކަށުނަމާދު ކުރުން ނޯންނަ ކަމަށާއި ޝަހީދުންގެ މައްޗަށް އޮތީ ހެޔޮ ދުއާކުރުން ކަމަށެވެ.