އަމާޒަކީ އަންނަ އޭޕްރީލްގެ ކުރިން ބިދޭސިންގެ ބަޔޯމެޓްރިކް ޑޭޓާ ނަގާ ނިންމުން ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވަޒީރު އިޙްސާން ވިދާޅުވީ ބިދޭސިންގެ މައްސަލަ ހައްލު ކުރަން މިދިޔަ އޭޕްރީލް މަހު ފެށި އޮޕަރޭޝަން ކުރަނގި 82 ރަށެއްގައި ކުރިއަށް ގެންގޮސްފައިވާ ކަމަށެވެ. އަދި އެޕްރޮގްރާމްގެ ދަށުން މިހާތަނަށް 6،891 ބިދޭސީންގެ ފިންގަ ޕްރިންޓާއި ބަޔޯމެޓްރިކް ޑޭޓާ ނަގާފައިވާ ކަމަށް އިޙްސާން މިއަދު ވިދާޅުވިއެވެ.

އިޙްސާން ވިދާޅުވީ އަމާޒަކީ އަންނަ އަހަރުގެ އޭޕްރީލްގެ ކުރިން މި މަސައްކަތުގެ ފުރަތަމަ ފޭސް އެއްކޮށް ނިންމުން ކަމަށެވެ.

“މަސައްކަތް ކުރިއަށް ދާގޮތަށް ބަލާއިރު ލަފާކުރެވެނީ އަންނަ ޖެނުއަރީ މަހުގެ ނިޔަލަށް މަސައްކަތް ނިމޭނެ ކަމަށް.” އިހުސާން މިއަދު ވިދާޅުވި އެވެ.

އިޙްސާން މިހެން ވިދާޅުވެފައިވާއިރު 3 މަރުހަލާއަށް ބަހާލައިގެން މުޅި ރާއްޖޭގައި 3 އަހަރަށް ކުރިއަށް ގެންދާ އޮޕަރޭޝަން ކުރަނގި އިފްތިތާޙް ކޮށްފައިވަނީ 2 މެއި 2024 ވީ ބުރާސްފަތި ދުވަހު ކ. ހިންމަފުށީގައެވެ.

މި މަސައްކަތުގައި ކުރިއަށް އޮތް ދެއަހަރުގެ ޓާގެޓަކީ ރަސްމީ ލިޔެކިޔުންތައް ނެތް، ސިސްޓަމް ތެރެއަށް ނުގެނެވޭ މީހުން ރާއްޖެއިން ބޭރު ކުރުން ކަމަށް ދާޚިލީ ވުޒާރާއިން މީގެކުރިން ވަނީ ހާމަކޮށްފައެވެ.

އޮޕަރޭޝަން ކުރަނގީގެ މަސައްކަތް ކާމިޔާބު ކަމަށް ވަޒީރު ވިދާޅުވެފައިވާއިރު ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ އަދަދު މިހާތަނަށް އެއްވެސް ސަރުކާރަކަށް ހޯދިފައެއް ނުވެއެވެ.