ބިދޭސީންގެ ފީގެ ގޮތުގައި ދައުލަތަށް ނުލިބި އޮތް އެއް ބިލިއަނަށް ވުރެ ގިނަ ރުފިޔާ ހޯދާފައިވާ ކަމަށް ދާޚިލީ ވަޒީރު އަލީ އިޙްސާން މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވަޒީރު އިހުސާން ވިދާޅުވީ، ޖޫން ތިންވަނަ ދުވަހާ ހަމައަށް ވިސާ ފީ، ވޯކް ޕާމިޓް ފީ، އަދި ކޯޓާ ފީއާއި ޖޫރިމަނާގެ ގޮތުގައި 1.7 ބިލިއަން ރުފިޔާ ނުލިބި އޮތް ކަމަށެވެ.

އަދި އެ ފައިސާގެ ތެރެއިން މިހާރު ނުލިބި އޮތީ 703 މިލިއަން ރުފިޔާ ކަމަށާއި މިއަދުގެ ނިޔަލަށް ބިލިއަނަކަށް ވުރެ ގިނަ ރުފިޔާ ހޯދާފައިވާ ކަމަށް އިހުސާން ވިދާޅުވިއެވެ.

އޭގެ އިތުރުން އިޙްސާން މިއަދު ވިދާޅުވީ ބިދޭސީންގެ ފީތައް މިހާތަނަށް ނުދައްކާ ހުރި ކުންފުނިތަކާއި އަމިއްލަ ފަރާތްތަކަށްވެސް އެކްސްޕެޓް ސިސްޓަމުން ޚިދުމަތް ފޯރުކޮށްދޭނީ ދައްކަން ޖެހިފައިވާ ފައިސާ ދައުލަތަށް ދެއްކުމުން ކަމަށެވެ.

އިޙްސާން މިހެން ވިދާޅުވެފައިވާއިރު ބިދޭސީންގެ ފީތަކުގެ ގޮތުގައި ނުލިބި ހުރި ފައިސާ ހޯދުމުގެ މަސައްކަތް ސަރުކާރުން ފެށީ މި އަހަރުގެ ޖޫން މަހުގެ ތިންވަނަ ދުވަހުއެވެ.

އަދި ރާއްޖޭގައި ވަޒީފާ އަދާކުރާ ބިދޭސީންނާ ގުޅޭގޮތުން ދޫކުރާ ހުއްދަތަކާ ގުޅިގެން ދައުލަތަށް ދައްކަންޖެހޭ ފީތަކާއި ޖޫރިމަނާތައް ވަކިމުއްދަތެއްގެ ތެރޭގައި ބަހާލައިގެން ދައްކަން ފުރުސަތު ދޭން މީގެ ކުރިން ސަރުކާރުން ވަނީ ނިންމާފައެވެ.