ކޯވިޑް-19 އާ ގުޅިގެން ޚާރިޖީ ވުޒާރާއަށް ހަރަދު ކުރުމަށް ދީފައިވާ ބަޖެޓުގެ ތެރެއިން، އެ ވުޒާރާއިން ޚަރަދު ކޮށްފައިވަނީ، ދައުލަތުގެ މާލިއްޔަތު ގާނޫނާއި އެއްގޮތަށް ކަމަށް އޮޑިޓު ރިޕޯޓުގައި ބުނެފިއެވެ.

ފަތުރުވެރިކަމާ ބެހޭ ވުޒާރާއާއި، ސިއްހީ ވުޒާރާގެ އޮޅުވާލުންތަކާއި، ބޮޑެތި ކޮރަޕްޝަންގެ އަމަލުތަކެއް އެކުލެވޭ ރިޕޯޓުތަކަށްފަހު، ޚާރިޖީ ވުޒާރާގެ އޮޑިޓް ރިޕޯޓު އާއްމުކޮށްފައިވަނީ މިއަދުގެ ވަގުތެއްގައެވެ. ކޯވިޑް-19 ގެ ހާލަތުގެ ތެރެއިން ޚާރިޖީ ވުޒާރާއިން ކުރި ހަރަދުގެ ކޮމްޕްލަޔަންސް ރިޕޯޓު އާއްމުކުރިއިރު، އޮޑިޓުގައިވާ ގޮތުން ހުރިހާ މަސައްކަތްތަކަކާއި މަސްއޫލިއްޔަތެއް އެ ވުޒާރާއިން އަދާކޮށްފައިވަނީ ކަނޑައަޅާފައިވާ އުސޫލުތަކުގެ ތެރެއިންނެވެ.

މިދިޔަ މެއި މަހުގެ ތެރޭގައި ރައްޔިތުންގެ މަޖިލީހުން ވަނީ، ދައުލަތުގެ މުއައްސަސާތަކުން ކޮވިޑާއި ގުޅިގެން ކޮންމެ ކުއާޓާއެއްގައި ކުރާ ހަރަދުތަކާއި ހިލޭ އެހީއާއި ދަރަނީގެ އޮޑިޓެއް ކުރުމަށް ފާސްކޮށްފައެވެ.

އެކަމާ ގުޅިގެން އޮޑިޓަރ ޖެނެރަލްގެ އޮފީހުން ކޮށްފައިވާ އޮޑިޓުގައި ވާގޮތުން ފޮރިން މިނިސްޓްރީއިން ހަރަދުތައް ކޮށްފައިވަނީ، ދައުލަތުގެ މާލިއްޔަތުގެ ގާނޫނާއި ދައުލަތުގެ މާލިއްޔަތުގެ ގަވާއިދާއި، ކޮވިޑާ ގުޅިގެން ފިނޭންސްއިން ނެރެފައިވާ ސާކިއުލާތަކާއި އުސޫލްތަކާއި އެއްގޮތަށެވެ.

ޖެނުއަރީ މަހުން ފެށިގެން، ޖޫން މަހުގެ ނިޔަލަށް ފޮރިން މިނިސްޓްރީން ކުރި ހަރަދުތަކާއި ގުޅޭގޮތުން އޮޑިޓުގައި ބުނެފައިވަނީ އޮޑިޓް ކުރިޔަށް ގެންދިއުމުގައި، މިނިސްޓްރީ އާއި ދައުލަތުގެ އެހެނިހެން ބައެއް މުއައްސަސާތަކުން އޮޑިޓަށް ފޯރުކޮށްދިން ލިޔެކިއުންތައް ބަލައި ދިރާސާ ކުރި ކަމަށެވެ.

ކޯވިޑް-19 އާ ގުޅިގެން މިނިސްޓްރީ އޮފް ފޮރިން އެފެއާޒް އިން 1 ޖަނަވަރީ 2020 އިން 30 ޖޫން 2020 ގެ ނިޔަލަށް ކުރި ޚަރަދު ކަމަށް "ކޯވިޑް-19 އާ ގުޅިގެން ޚަރަދު ކުރުމަށް ކަނޑައެޅުނު ބަޖެޓާއި އެ ފައިސާ ހޭދަކުރެވުނު ގޮތުގެ ބަޔާނު" ގައި ހިމަނާފައިވާ ޚަރަދުތަކަކީ މައިގަނޑުގޮތެއްގައި ދައުލަތުގެ މާލިއްޔަތުގެ ޤާނޫނާއި، ދައުލަތުގެ މާލިއްޔަތުގެ ގަވާއިދާއި، މިނިސްޓްރީ އޮފް ފިނޭންސުން ކަނޑައަޅުއްވާފައިވާ އުޞޫލުތަކާއި އަދި ޚަރަދު ކުރުމަށް މިނިސްޓްރީ އޮފް ފޮރިން އެފެއާޒުން އެކުލަވާލާފައިވާ އުޞޫލުތަކާއި އެއްގޮތަށް ކޮށްފައިވާ ޚަރަދުތަކެއް ކަމަށް އޮޑިޓް ރިޕޯޓްގައި ވަނީ ފާހަގަކޮށްފައެވެ.

ކޯވިޑް-19 އާ ގުޅިގެން 3 ދާއިރާއަކުން އެ މިނިސްޓްރީގެ ޚަރަދުތައް ކޮށްފައި ވާއިރު އޭގެ ތެރޭގައި ހިމެނެނީ، ކޯވިޑް-19 އާ ގުޅިގެން ރާއްޖެއިން ބޭރުގައި ހާލުގައި ޖެހިފައި ތިބި ދިވެހީންނަށް ދެވުނު ފައިސާގެ އެހީ އާއި، ރާއްޖެއިން ބޭރުގައި ތިބި މެޑިކަލް ދާއިރާއިން ތަޢުލީމު ހާސިލްކުރަމުން ދިޔަ ދިވެހީންނާއި އިތުރު ބައެއް ދިވެހި ރައްޔިތުން އަނބުރާ ރާއްޖެ ގެނައުމަށް ހިނގި ޓިކެޓް ޚަރަދާއި، ކޯވިޑް-19 އާ ގުޅިގެން ކުރެވުނު އެހެނިހެން ޚަރަދު ތަކެވެ.

އެގޮތުން ކޯވިޑް-19 އާ ގުޅިގެން ރާއްޖެއިން ބޭރުގައި ހާލުގައި ޖެހިފައި ތިބި ދިވެހިންނަށް މާލީ އެހީތެރިކަން ފޯރުކޮށްދިނުމަށްޓަކައި އެ ވުޒާރާއިން 2 އުސޫލެއް އެކުލަވާލާފައި ވާއިރު، މިނިސްޓްރީ އޮފް އިސްލާމިކް އެފެއާޒުން ބަލަހައްޓާ ޒަކާތުފަންޑު މެދުވެރިކޮށް، ރާއްޖެއިން ބޭރު ގައުމުތަކުގައި ރާއްޖެ ނާދެވި ހާލުގައި ޖެހިފައި ތިބި ދިވެހިންނަށް މާލީ އެހީތެރިކަން ފޯރުކޮށްދިނުމަށްޓަކައި 31 މާޗު ގައި އުސޫލެއް އެކުލަވާލާފައިވެއެވެ. މި އުސޫލުގެ ދަށުން ފައިސާގެ އެހީތެރިކަން ފޯރުކޮށްދީފައިވަނީ 10 އޭޕްރީލްގެ ނިޔަަލަށް ކަމަށް ރިޕޯޓުގައި ވެއެވެ.

މީގެ އިތުރުން އޮޑިޓުގައި ބުނެފައިވަނީ ރާއްޖެއިން ބޭރު ގައުމުތަކަށް އެކިއެކި ޒަރޫރީ ބޭނުންތަކަށް ގޮސްތިބި މީހުންގެ ތެރެއިން ކޮވިޑް އާ ގުޅިގެން ގައުމުތަކުގެ ބޯޑަރު ބަންދު ކުރުމާއި ގުޅިގެން ރާއްޖެ ނާދެވި ހާލުގައި ޖެހިފައި ތިބި ދިވެހިންނާއި، އެކިއެކި ސަބަބުތަކާއި ހެދި ދިގުމުއްދަތަށް ރާއްޖޭން ބޭރުގައި ބޭސްފަރުވާއަށް އަމިއްލަ ހަރަދުގައި ގޮސް ތިބި ދިވެހީންގެ ތެރެއިން ފައިސާގެ އެހީތެރިކަން ބޭނުންވާ މީހުންނާއި، ރާއްޖެއިން ބޭރުގައި އެކިއެކި ޒަރޫރީ ބޭނުމަށް ދިރިއުޅޭ ދިވެހީންގެ ތެރެއިން ގިނަ ބަޔަކު ފައިސާގެ އެހީތެރިކަމަށް އެދެމުން ދިއުމުގެ ސަބަބުން، އެފަރާތްތަކަށް ފައިސާގެ އެހީތެރިކަން ފޯރުކޮށްދިނުމަށް އެކުލަވާލި އުސޫލުގެ ދަށުން ފައިސާގެ އެހީތެރިކަން ފޯރުކޮށްދީފައިވަނީ އޭޕްރީލް މަހުގެ 24 ވަނަ ދުވަހުން ފެށިގެން 15 ދުވަހުގެ މުއްދަތަށް ކަމަށެވެ.

ކޮވިޑްގެ ކަންކަމަށް ހަރަދު ކުރުމަށް ދައުލަތުގެ ބަޖެޓުންނާއި ހާލުގައި ޖެހިފައި ތިބި ދިވެހިންނަށް ހަރަދު ކުރުމަށް އިސްލާމިކް މިނިސްޓްރީގެ ޒަކާތު ޓްރަސްޓްފަންޑުން ދޫކުރި ފައިސާއާއެކު ޖުމްލަ 10.1 މިލިއަން ރުފިޔާ ވަނީ ފޮރިން މިނިސްޓްރީ އަށް ދޫކޮށްފައެވެ. އޭގެތެރެއިން އެ މިނިސްޓްރީން ވަނީ، 7.2 މިލިއަން ރުފިޔާ ހޭދަކޮށް، 2.8 މިލިއަން ރުފިޔާ ބާކީކޮށްފައެވެ.