10 ޕަސެންޓް އުނިކުރުމަށް ފަހު މުސާރަ ނަންގަވަން ވެރިކަން ކުރާ ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެމްބަރު އިބްރާހިމް ފަލާހު ނިންމަވައިފި އެވެ.

ފަލާހު އެކްސްގައި ވިދާޅުވީ' މިއީ ރައީސް ޑރ. މުހައްމަދު މުއިއްޒު ގައުމުގެ އިގުތިސާދީ ހާލަތު ރަނގަޅުކޮށް އާމްދަނީ އިތުރުކޮށް ހަރަދުަތައް ކުޑަކުރުމަށް އަޅުއްވަމުން ގެންދަވާ ފިޔަވަޅުތަކަށް އެއްބާރުލުން ދިނުމުގެ ގޮތުން ނިންމެވި ނިންމެވުމެއް ކަމަށެވެ.

އެހެންވެ އަންނަ މަހުން ފެށިގެން މަޖިލީހުން ލިބިވަޑައިގަންނަވާ މުސާރައިގެ 10 ޕަސެންޓް އުނިކުރުމަށް ނިންމަވާފައިވާ ކަމަށް ވެސް އޭނާ ވިދާޅުވި އެވެ.

ހަރަދުތައް ކުޑަކުރުމަށް ސިޔާސީ މުވައްޒަފުންނާއި ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް ކުޑަ ކުރަން ނިންމިކަން ރައީސް މުއިއްޒު އިއުލާންކުރެއްވީ މިދިޔަ ބުދަ ދުވަހު އެވެ.

އެ ނިންމެވުމާއެކު ރައީސް ޑރ. މުހައްމަދު މުއިއްޒާއި ރައްޔިތުންގެ މަޖިލީހުގެ ރައީސް އަބްދުއް ރަހީމް އަބްދުﷲ ވެސް ވަނީ މުސާރައިގެ 50 ޕަސެންޓް ނުނަންގަވަން ނިންމަވައިފަ އެވެ.

ރައްޔިތުންގެ މަޖިލީހުގެ މެމްބަރަކަށް މިހާރު މުސާރައިގެ ގޮތުގައި 42،500ރުފިޔާއާއި ލިވިން އެލަވަންސްގެ ގޮތުގައި 20،000 ރުފިޔާ ލިބިވަޑައިގަންނަވަ އެވެ. އަދި އެކި އެލަވަންސްތަކާއެކު ޖުމްލަ 82،500 ރުފިޔާ ލިބިވަޑައިގަންނަވަ އެވެ.

ރައީސް މުއިއްޒު މިދިޔަ ބުދަ ދުވަހު ވިދާޅުވީ ހަރަދުތައް ކުޑަކުރުމަށް ރައްޔިތުންގެ މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރުމަށް އެ ފަރާތްތަކުގައި އެދިވަޑައިގަންނަވާނެ ކަމަށެވެ.