ހއ. އިހަވަންދޫ މަގުހެދުމުގެ މަސައްކަތް ބާރު ސްޕީޑުގައި ކުރިޔަށްދާކަމަށް އެ މަސައްކަތް ކުރަމުންގެންދާ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

އާރްޑީސީން ބުނީ އިހަވަންދޫގައި ޒަމާނީ ފެންވަރަށް ތަރައްޤީ ކުރަމުންދާ މަގުތަކުގައި މިވަގުތު ކުރިއަށްދަނީ ކޮނެގެން ކުރަންޖެހޭ މަސައްކަތްތައް ކަމަށެވެ. މި މަޝްރޫއުގައި 15 މަގެއް ހިމެނޭހެން ޖުމްލަ 6.9 ކިލޯ މީޓަރުގެ މަސައްކަތް ކުރެވޭނެ ކަމަށް އެ ކުންފުނިން ވަނީ ބުނެފައެވެ.

މި މަސައްކަތުގެ ތެރެއިން މި ވަގުތު ކުރިއަށްދަނީ ކޭބަލް ޖަންކްޝަން ބެހެއްޓުމާއި ހޮޅި އެޅުމުގެ މަސައްކަތްތައް ކަމަށް އާރްޑީސީން ވަނީ ބުނެފައެވެ. މީގެ އިތުރުން ކާރބް ސްޓޯން ޖެހުމުގެ މަސައްކަތްވެސް ކުރަމުންދާކަމަށާއި މަޝްރޫއަށް ބޭނުންވާ ކާސްޓިންގ މަސައްކަތް އިހަވަންދޫ ސައިޓުގައި ކުރަމުންދާކަމަށް އެ ކޯޕަރޭޝަނުން ވަނީ ބުނެފައެވެ.

އިހަވަންދޫ މަގުހެދުމުގެ މަޝްރޫއަށް ސަރުކާރުން ވަނީ 102،846،733.89 ދިވެހި ރުފިޔާ ހަމަޖައްސާފައެވެ. އަދި މިހާތަނަށް މި މަޝްރޫއުގެ 20 އިން ސައްތަ މަސައްކަތް ކުރެވިފައިވާކަމަށް އާރްޑީސީން ބުނެއެވެ.