ހަށި ވިއްކުމުގެ މައްސަލައެއްގައި 9 ބިދޭސީއަކު އަތުލައިގަނެ، އޭގެ ތެރެއިން ބައެއް މީހުން ޑީޕޯޓްކޮށްފިއެވެ.

އިމިގްރޭޝަނުން އެކްސްގައި ހިއްސާކުރި ޕޯސްޓެއްގައި ބުނީ ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ ބިދޭސީން ހޯދުމަށް އިމިގްރޭޝަނާއި ފުލުހުން މި އޮކްޓޯބަރު މަހުގައި ވަނީ ޚާއްޞަ އޮޕަރޭޝަންތަކެއް ހިންގާފައި ކަމަށެވެ.

އެގޮތުން މި އޮޕަރޭޝަންތަކުގެ ތެރެއިން މިފަދަ ފަސް މައްސަލައަކާ ގުޅިގެން ބިދޭސީ 7 އަންހެނަކާއި އަދި އެމީހުންގެ އޭޖެންޓުންގެ ގޮތުގައި މަސައްކަތް ކުރަމުންދިޔަ 02 ބިދޭސީ ފިރިހެނަކު އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށް އިމިގްރޭޝަނުން ވަނީ ބުނެފައެވެ.

އަދި މި މައްސަލަ ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެ ތެރެއިން 05 އަންހެނަކު އަދި 01 ފިރިހެނަކު މިހާރު ޑީޕޯޓްކޮށްފައިވާ ކަމަށްވެސް އިމިގްރޭޝަނުން ވަނީ ބުނެފައެވެ.

މީގެ އިތުރުން އަނެއް ތިން ބިދޭސީން ޑީޕޯޓްކުރުމުގެ މަސައްކަތް މިހާރު ކުރަމުންދާ ކަމަށްވެސް އިމިގްރޭޝަނުން ވަނީ ބުނެފައެވެ.

ރާއްޖޭގައި ގަވާއިދާއި ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރިއަށްގެންދާ މަސައްކަތްތަކުގެ ތެރެއިން ދާދި ފަހުންވެސް މިފަދައިން ހަށިވުއްކަމުން ދިޔަ ބިދޭސީންތަކެއް ވަނީ ޑީޕޯޓްކޮށްފައެވެ.