ސަރުކާރުން މަޖިލީހަށް ހުށައެޅި ސަޕްލިމެންޓަރީ ބަޖެޓަށް އެއްވެސް ބަދަލެއް ނުގެނަސް ބަޖެޓް ދިރާސާ ކުރުމަށް އެކުލަވާލި ކޮމިޓީން ބަޖެޓް ފާސްކޮށްފިއެވެ.

ބަޖެޓް ކޮމިޓީން މިއަދު ވަނީ ކޮމިޓީ ބައްދަލުވުމަށް، ފިނޭންސް މިނިސްޓަރާއި އޮޑިޓާ ޖެނެރަލްގެ އޮފީހުގެ އިސް ބޭފުޅުންނާއި އެމްއެމްއޭގެ އިސް ބޭފުޅުން ހާޒިރުކޮށް، ބަޖެޓާ ބެހޭގޮތުން މަޢުލޫމާތު ސާފުކޮށްފައެވެ.

އެއަށްފަހު، ސަރުކާރުން ހުށަހެޅިގޮތަށް ކޮމިޓީން ބަޖެޓް ފާސްކުރަން ހުށަހެޅުއްވީ، މާމިގިލީ ދާއިރާގެ މެންބަރު ގާސިމް އިބްރާހިމެވެ. ތާއީދުކުރެއްވީ، ވެލިދޫ ދާއިރާގެ މެންބަރު މުހައްމަދު އައްބާސްއެވެ.

މި ބަޖެޓް ފާސްކުރީ ކޮމިޓީގައި އެވަގުތު ތިއްބެވި މެންބަރުންގެ އިއްތިފާގުންނެވެ.

މިދިޔަ ހަފްތާގައި މާލީ ވަޒީރު މަޖިލީހަށް ހުށަހެޅުއްވީ ޖުމުލަ 5,119,508,129 ރުފިޔާގެ ބަޖެޓެކެވެ. އެހެންވެ، މި ބަޖެޓާ އެކު މި އަހަރުގެ ޖުމްލަ ބަޖެޓު 55 ބިލިއަން ރުފިޔާއަށް އަރާނެއެވެ.

މި ބަޖެޓުގައި ރިކަރަންޓު ޚަރަދުގެ ގޮތުގައި 1.5 ބިލިއަން ރުފިޔާ ހިމަނާފައިވެއެވެ. އަދި ކެޕިޓަލް ޚަރަދުގެ ގޮތުގައި 3.6 ބިލިއަން ރުފިޔާ ހިމަނާފައިވެއެވެ.

ސަޕްލިމެންޓަރީ ބަޖެޓާ އެކު މި އަހަރުގެ ބަޖެޓު ޑެފިސިޓު 18 ބިލިއަން ރުފިޔާއަށް އަރާނެއެވެ. އެއީ، އުފެއްދުންތެރިކަމުގެ ނިސްބަތުން 16 އިންސައްތައެވެ. އެހެންކަމުން އަހަރު ނިމޭއިރު ދަރަނި ހުންނާނީ އުފެއްދުންތެރިކަމުގެ ނިސްބަތުން 118 އިންސައްތައިގައި ކަމަށް ވަނީ ލަފާކޮށްފައެވެ.

މި ސަޕްލިމެންޓަރީ ބަޖެޓުގައިވަނީ ޖުމުލަ އާމްދަނީއާއި ހިލޭ އެހީއަށް އިތުރަށް 640 މިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ. އެއީ، ޓެކުހުގެ ގޮތުގައި ލިބޭ އާމްދަނީން އިތުރު 61 މިލިއަނާއި އެހެނިހެން އާމްދަނީގެ ގޮތުގައި 379 މިލިއަނާއި ހިލޭ އެހީގެ ގޮތުގައި 199 މިލިއަން ރުފިޔާއެވެ.