އަތޮޅު ކައުންސިލްގެ ރައީސުންނަކީ ވެސް ރައީސުލްޖުމްހޫރިއްޔާ އައްޔަނުކުރާ ބައެއްގެ ގޮތުގައި ހަދަން ފޭދޫ ދެކުނު ދާއިރާގެ މެމްބަރު އިބްރާހިމް ދީދީ ގޮވާލައްވައިފި އެވެ.

އޭސީސީގެ ރައީސާއި ނާއިބު ރައީސް ރައީސުލްޖުމްހޫރިއްޔާ އައްޔާނުކުރާ ގޮތަށް އޭސީސީގެ ގާނޫނަށް އިސްލާހު ގެންނަން ހުށަހަޅާފައިވާ ބިލަށް މިއަދު މަޖިލީހުގައި ކުރި ބަހުސްގައި މެމްބަރު އިބްރާހިމް ދީދީ ވިދާޅުވީ އޭސީސީގެ މެމްބަރުންގެ މެދުގައި ވޯޓު ލައިގެން ވެރިން ހޮވުމާއި ރައީސުލްޖުމްހޫރިއްޔާ އައްޔަނުކުރުމުގައި މާބޮޑު ތަފާތެއް ނެތް ކަމަަށެވެ.

އަދި ހުރިހާ ކޮމިޝަންގެ ވެރިންވެސް އެގޮތަށް އައްޔަނުކުރެވޭ ގޮތަށް ބަދަލު ގެންނަން ޖެހޭ ކަމަށް އޭނާ ވިދާޅުވި އެވެ.

އިބްރާހިމް ދީދި ވިދާޅުވީ އެކި ކޮމިޝަންތަކުގެ ރައީސުން އުޅުއްވަނީ އެކި ގައުމުތަކުގެ ރައީސުންނަށް ހެދިގެން ކަމަށެވެ. އަދި ސަރުކާރުންނާއި ރައްޔިތުން އެދޭ ގޮތަށް ކޮމިޝަންތައް ނުހިންގާ ކަމަށް އޭނާ ވިދާޅުވިއެވެ.

"އަޅުގަނޑަށް ފެންނަގޮތުގައި ހަަމައެކަނި ކޮމިޝަންތަކުގެ ރައީސެއް ނޫން. އަޅުގަނޑު މި ވާހަކަ ދައްކާތީ ބައެއް ބޭފުޅުން ވަރަށް ރުޅި އަންނާނެ. އެކަމަކު ހަގީގަަތަކީ މި ރާއްޖޭގައި މި ތިބަ އަތޮޅު ކައުންސިލްތަކުގެ ރައީސުން ވެސް ގެންދަންވީ ރައީސުލްޖުމްހޫރިއްޔާ އައްޔަންކޮށްގެން،" ޑީޑީ ވިދާޅުވި އެވެ.

އިބްރާހިމް ދީދީ އިތުރަށް ވިދާޅުވީ ކުރިން ރައީސުލްޖުމްހޫރިއްޔާ އަތޮޅު ވެރިންނާއި ކަތީބުން އައްޔަން ކުރި ޒަމާނުގައި އަތޮޅުތަކުގެ ކަންތައްތައް ހިނގަމުން ދިޔައީ މާރަނގަޅަށް ކަމަށެވެ. އަދި އޭރުގައި އޮންނަ ސަރުކާރާ ގުޅިގެން، ސަރުކާރުން އެދޭ ގޮތަކަށް ތަރައްގީގެ މަޝްރޫއޫތަކާއި ގައުމަށް ލިބޭ އެއްޗަކާއި ނުލިބޭ އެއްޗަކަށް ރިއާޔަތްކޮށް ބަލައިގެން ކަންތައްތައް ކުރަމުން ދިޔަ ކަމަށް އޭނާ ވިދާޅުވިއެވެ.