މަޖީދީ މަގުގައި ހުންނަ މޮބައިލް ވިއްކާ މަޝްހޫރު 'ޒިއޯން މޮބައިލްސް 4' ފިހާރަ ފަޅާލައި ވައްކަންކުރި މައްސަލައިގައި މީހަކު ހައްޔަރުކޮށްފިއެވެ.

އެ ފިހާރައިގެ ބިއްލޫރިގަނޑެއް ތަޅާލައިގެން ވައްކަން ކުރީ މިއަދު ފަތިހު 05:35 އެހާކަށްހާއިރުއެވެ.

ޒިއޯން ފިހާރައިގެ ވެރިޔާ ރަފީއުއްދީން ޙަސަން އެކްސްގައި ވިދާޅުވީ ވަގަށް ނެގި ތަކެތީގެ އަގު އެއްލައްކަ ރުފިޔާއަށްވުރެ މަތިވާނެ ކަމަށެވެ.

އެ މައްސަލައާ ގުޅޭ ގޮތުން ފުލުހުން މިއަދު މީޑިއާތަކަށް ފޮނުވި މެސެޖުގައި ބުނީ 47 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.

ފުލުހުން ބުނީ އެ މައްސަލަ ތަހުގީގުކުރަމުންދާ ކަމަށެވެ. އިތުރު އެހެން ތަފްސީލެއް ނުދެއެވެ.

އެ ހާދިސާއާ ގުޅޭ ވީޑިއޯ ސޯޝަލް މީޑިއާގައި އާންމުވެފައި ވާއިރު އެ ވައްކަން ކުރީ ދެ މީހުން ގުޅިގެން ކަމަށް ވަރަށް ބޮޑަށް ބެލެވެއެވެ.

ވީޑިއޯއިން ފެންނަ ގޮތުން ބިއްލޫރިގަނޑު ތަޅާލަނީ ވަކި މީހެކެވެ. އަދި ފިހާރައިން އެއްޗެތި ކޮތަޅަކަށް އަޅައިގެން ދަނީ އެހެން މީހެކެވެ.