ބޮލުން އިސްތަށި ފޭބުމަކީ އަޅުގަނޑުމެންގެ ތެރެއިން ވަރަށް ގިނަ މީހުންގެ ކަންބޮޑުވުން އޭގައި އެކުލެވިގެންވާ ކަމެކެވެ. އަދި އެކަމަށް ލިބެން ހުރި ފަރުވާތައް ކޮންމެ އަގެއްގައި ނަމަވެސް ހޯދުމަކީ އެންމެންވެސް ނުހަނު ގަޔާވެގެން ކުރާ ކަމެކެވެ. އެހެން ނަމަވެސް އިސްތަށިގަނޑު ހަލާކުވެ މާގިނައިން އިސްތަށި ފައިބާނަމަ ކުޑަޚަރަދަކުން އިސްތަށިގަނޑަށް ފަރުވާ ކުރުމަށް އަލުވި ޖޫހަކީ ބޭނުން ކުރަން ވަރަށް ރަނގަޅު އެއްޗެކެވެ.



ޢާއްމުކޮށް ފިހާރަތަކުގައި ވިއްކަން ހުންނަ އެއްޗިއްސަކީ އެކިކަހަލަ ކެމިކަލް އެކުލެވިގެންވާ އެއްޗިއްސެވެ. ނަމަވެސް އަލުވި ޖޫހަކީ ގޭގައި ހަދާލަން ފަސޭހަ އެހާމެ ރަނގަޅު އެއްޗެކެވެ. އަލުވި ޖޫހަކީ ގިނަބަޔަކު ބޭނުންކުރާ އަދި ވަރަށް މަގުބޫލުކަންވެސް ލިބިފައިވާ އެއްޗެކެވެ.



އަލުވި ޖޫހަކީ އޭގައި އެކިކަހަލަ ވިޓަމިންސް އެކުލެވިގެންވާ އެއްޗެކެވެ. އަލުވި ޖޫހުގައި އެކުލެވޭ ގިނަ މާއްދާ ތަކަކީ އޮކްސިޖަން ލެވަލް އިތުރު ކޮށްދީ އަދި ކޮލެގަން އުފައްދައިދިނުމަށް އެހީތެރިވެދޭ މާއްދާތަކެކެވެ. ކޮލެގަންއަކީ ހަމުގައި ހުންނަ ޕްރޮޓީންއެވެ. އަދި މި މާއްދާއަކީ އިސްތަށިގަނޑު ދިގު ކޮށްދިނުމުގައިވެސް ބޮޑު ރޯލެއް އަދާ ކުރާ މާއްދާއެކެވެ.



އަލުވީގައި ހުންނަ ބާރުގަދަ އެކިއެކި މާއްދާގެ ސަބަބުން އިސްތަށިގަނޑުގެ ޕީ.އެޗް ލެވެލް ރަނގަޅު މިންގަނޑެއްގައި ހިފަހައްޓައިދެއެވެ. އަދި ޑޭންޑްރަފް އާއި އެހެނިހެން ފަންގަލް އިޝޫޝްތަކުން ރައްކާތެރި ކޮށްދެއެވެ. މީގެ އިތުރުން އަލުވީގައި ހުންނަ ވިޓަމިންސް އަދި މިނަރެލްސްގެ ސަބަބުން އިސްތަށިގަނޑު އޮމާން ކޮށްދީ ރަނގަޅު ކޮށްދެއެވެ. އަލުވި ޖޫސް ކޮންމެ ދުވަހަކު ބޭނުން ކުރުމުން އިސްތަށިގަނޑުގައި ކޮލެގަން ހަރުލާފަ ހުންނާނެއެވެ. ކޮލެގަންއަކީ އިސްތަށިގަނޑު ދުޅަހެޔޮކޮށް ބަހައްޓަން ބޭނުންވާ ވަރަށް މުހިއްމު މާއްދާއެކެވެ. ބަލިކަށިވެ ފައިބަމުންދާ އިސްތަށިގަނޑަށް ދުޅަހެޔޮކަން ގެނައުމަށް އަލުވި ޖޫހުގެ އަޖުމަ ބައްލަވާލެއްވުން ކީއްތޯއެވެ.