ހުޅުމާލޭ ހިޔާ ފްލެޓެއްގައި މީހަކު ރަހީނުކުުރި މައްސަލާގައި ހައްޔަރު ކުރި މީހުންގެ ވަނަވަރު ހާމަކޮށްފިއެވެ.

ހުޅުމާލޭ ހިޔާ ފްލެޓެއްގައި މީހަކު ރަހީނުކޮށްފައިވާ ކަމުގެ ރިޕޯޓް ލިބިގެން ފުލުހުން ޚާއްސަ އޮޕަރޭޝަނެއް ހިންގާފައިވަނީ މިދިޔަ ބުރާސްފަތި ދުވަހުގެ ރޭގެ ވަގުތެއްގައެވެ. އެގޮތުން ފުލުހުން ވަނީ އެ މައްސަލާގައި ސީނުން ފެނުނު ގޭންގުގެ 12 މެންބަރަކު ހައްޔަރު ކޮށްފައެވެ.

މި މައްސަލާގައި ފުލުހުން ހައްޔަރު ކޮށްފައިވާ 12 މީހުންނަކީ ގދ. ވާދޫ ވެހި އަލްމާން އަލީ ޚާލިދާއި، މ. ހަތިކަނޑު މުހައްމަދު އިޒްކާން އާއި، ކ. ގުރައިދޫ ޒުނައިޓް ވިލާ އިޛާން އަހުމަދާއި، ށ. ފޯކައިދޫ ދަންމަރު އަހުމަދު ޒާހިދާއި، ލ. މާވަށް އާދަމް ޙުސައިނާއި، ލ. އިސްދޫ ހިޔާލީ ގުލްޝަން އިބްރާހިމް ނަޝީދާއި، ބ. ގޮއިދޫ ނައިޓްސްޓާ އަހުމަދު ސަމީޙެވެ.

އޭގެ އިތުރުން ވ. ގާމާ އިސްމާއިލް ވިސާމް މުހައްމަދާއި، ގދ. ވާދޫ ޗިޗަންޑާގެ ވިޝާމް މުހައްމަދާއި، ހުޅުމާލެ ހިޔާ 14-17-03 ވިސާން މުހައްމަދާއި، ގދ. ވާދޫ ޖަނަވަރީގޭ މުޝްތާޤު ޝާކިރާއި، މ. ކޮޅުފުށީ އާރެސް ހަސަން ޣާލިބް ވެސް މި މައްސަލާގައި ފުލުހުން ވަނީ ހައްޔަރު ކޮށްފައެވެ.

ފުލުހުން ބުނީ މި މީހުންނަކީ ދެ ގުރޫޕަކަށް ނިސްބަތްވާ ބައެއް ކަމަށެވެ. ކްރިމިނަލް ކޯޓުން މިހާރުވަނީ އެމީހުންގެ ތެރެއިން އަލްމާންއާއި އިޒްކާން އަދި އިޛާން ފަސް ދުވަހަށް ބަންދު ކުރަން ނިންމާފައެވެ. އަދި ބާކީ ތިބި ނުވަ މީހުން ބަންދު ކޮށްފައިވަނީ ހަތް ދުވަހަށެވެ.

ފުލުހުން ހިޔާ 9ވަނަ ޓަވަރުގެ 20 ވަނަ ފްލޯގެ 11 ވަނަ އެޕާޓްމަންޓަށް ގަދަބާރުން ވަދެގަތް އިރު، އެތަނުގެ ތެރޭގައި 12 މީހުންގެ ގްރޫޕަކުން ތައްޔާރުވަމުން ދިޔައީ މީހަކު ރަހީނުކޮށް ބޯ ބޭލުމަށް ފަހު، އެ މީހާގެ އިނގިލި ބުރިކުރުމަށެވެ.

ފުލުހުން ބުނީ އެ އެޕާޓްމަންޓަކީ ޑްރަގްގެ މައްސަލައެއްގައި ފުލުހުން އެކި ފަހަރުމަތިން މީގެ ކުރިންވެސް ރެއިޑް ކޮށްފައިވާ އެޕާޓްމަންޓެއް ކަމަށެވެ.

މި މައްސަލައިގައި ގާނޫނުގެ ތެރެއިން އެޅެން ހުރި އެންމެ ހަރުކަށި ފިޔަވަޅު އަޅުއްވާނެ ކަމަށް ހޯމް މިނިސްޓަރު އަލީ އިހުސާންވެސް ވަނީ ވިދާޅުވެފައެވެ.