ރާއްޖޭގެ އިގުތިސާދަށް ބޮޑު ފައިދާއެއް ވާނެ ކަމަށް އަންދާޒާ ކުރާ ބަންކަރިންގެ ހިދުމަތުގެ ތެރެއިން “ފެން ބާޖު” ޚިދުމަތް ތައާރަފް ކޮށްފިއެވެ.

މޯލަޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރު މުޙައްމަދު ވަޖީހު އިބްރާހިމް ވިދާޅުވީ ވޯޓަރ ބަންކަރިންގ އަށް ތައްޔާރު ކުރި “ފެން ބާޖު” ޚިދުމަތަށް މިއަދު ނެރެ ހިދުމަތް ދޭން ފަށާފައިވާ ކަމަށެވެ.

އެމްޑީ ވަޖީހު ވިދާޅުވީ މިދިޔަ ސެޕްޓެމްބަރ މަހު 19 ވަނަ ދުވަހު ފެށި މިޚިދުމަތުގައި، ވޯޓަރ ބަންކަރިންގ ޚިދުމަތަށް ފުރަތަމަ ބޭނުން ކޮށްފައި ވަނީ، ކޮޅުވެއްޓި އެއްގައި ކަޅު ހަން ބަހައްޓައިގެން ކަމަށެވެ. ނަމަވެސް އެއިގެ ފަހުން ދެމަސް ދުވަސް ނުވަނީސް މިހާރު ތިލަފުށީގައި އެމްޕީއެލްގެ ޑޮކުޔާޑުގައި، އެމްޕީއެލް އިން ތައްޔާރު ކުރި ބާޖެއް ބޭނުން ކުރަން ފަށާފައިވާކަމަށް އޭނާ ވިދާޅުވިއެވެ.

ވޯޓަރ ބަންކަރިންގ އަށް ބޭނުން ކުރަން ފަށާފައި ވަނީ 200 ޓަނުގެ ފެން ރައްކާ ކުރެވޭ ބާޖެއް ކަމަށް އެމްޕީއެލްއިން މައުލޫމާތު ދެއެވެ. ވަޖީހު ވިދާޅުވީ ކުރިޔަށް އޮތް ތަނުގައި ވޯޓަރ ބަންކަރިންގ އަށް ބޭނުން ކުރެވޭނީ މިހާރު ތައާރަފް ކުރެވުނު ބާޖެވެ.

ވަޖީހު ވިދާޅުވީ މިހާރު ތައާރަފް ކުރެވުނު ބާޖުގެ ޚިދުމަތް ފުރިހަމަ ކުރުމަށްޓަކައި ލަސްތަކެއް ނުވެ، ބާޖުގައި ފެން ޕުލާންޓެއް ބަހައްޓައި، ބާޖުގައި ފެން އުފައްދައި ބޭނުން ކުރަން ފެށޭނެ ކަމަށެވެ.

ރާއްޖޭގެ އެންމެ އުތުރުގައި ބަންކަރިންގެ ޚިދުމަތް ފެށީ މިދިޔަ މަހުގެ 18ވަނަ ދުވަހުއެވެ. ބަންކަރިންގެ ހިދުމަތުގެ ތެރެއިން، ބޯޓުފަހަރަށް ތެޔޮ އަޅައިދިނުމާއި، ފަޅުވެރިން ބަދަލު ކުރުމުގެ ހިދުމަތާއި ބޯޓުފަހަރަށް ބޭނުންވާ ސްޕެއާ ފަދަ ސާމާނު ފޯރުކޮށްދިނުމާއި މަރާމާތު ކޮށްދިނުމުގެ އިތުރުން ކުރިޔަށް ވުރެ ރަނގަޅަށް ބޯޓުތަކަށް ސާފު ބޯފެން ފޯރުކޮށްދޭނެ އެވެ.