ހުޅުމާލޭ ހޮސްޕިޓަލްގެ އިމަޖެންސީ ރޫމް(އީއާރް) ބޮޑުކުރުމަށް ރޯޑް ޑިވެލޮޕްމަންޓް ކޯޕަރޭޝަން(އާރްޑީސީ) އާ ހަވާލުކޮށްފިއެވެ.

ހުޅުމާލޭ ހޮސްޕިޓަލުގައި އޮތް ރަސްމިއްޔާތެއްގައި އެ ހޮސްޕިޓަލްގެ އީއާރް ބޮޑުކުރުމުގެ އެއްބަސްވުމުގައި ސޮއިކުރެއްވީ މާލެ ގްރޫފް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމެވެ. އަދި އާރްޑީސީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރެވެ.

މި އެއްބަސްވުމުގެ ދަށުން މިހާރު ހުޅުމާލޭ ހޮސްޕިޓަލުގައި ބޭނުން ކުރަމުން އަންނަ ހަތް އެނދުގެ އީއާރް ރޫމް 14 އެނދުގެ ޖާގައަށް ބޮޑު ކުރެވިގެންދާނެއެވެ.

މި އެއްބަސްވުމުގައި ސޮއި ކުރުމަށްފަހު މާލެ ގުރޫފް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވީ އީއާރް ބޮޑުކުރުމުގެ މަސައްކަތް އާރުޑީސީއާ ޙަވާލުކުރީ، މަސައްކަތުގެ ތަޖުރިބާ ހުރުމާއި އެ ކޯޕަރޭޝަނުން ކުރިއަށް ގެންދާ މަޝްރޫއުތައް ވެސް ބޭނުންވާ ފެންވަރަށް ބާރު ސްޕީޑުގައި ނިންމާތީ ކަމަށެވެ.

ހުޅުމާލޭ ހޮސްޕިޓަލް މިހާރު ހިންގަމުންދަނީ ޓާޝަރީ ހޮސްޕިޓަލެއްގެ ގޮތުގައެވެ. އެހޮސްޕިޓަލުގެ ތަފާސް ހިސާބުތަކުން ދައްކާ ގޮތުގައި މި އަހަރުގެ މިހާތަނަށް އެ ހޮސްޕިޓަލްގެ އިމަޖެންސީއާއި ޖީއޯޕީޑީ ޚިދުމަތް 250،000 އަށް ވުރެ ގިނަ މީހުން ހޯދާފައިވެއެވެ.

އާރުޑީސީން ބުނީ ދެ މަސް ތެރޭ މަސައްކަތް ނިންމާ ގޮތަށް އެ ކޯޕަރޭޝަނާއި މަސައްކަތް ހަވާލު ކޮށްފައިވާ ކަމަށެވެ. ހުޅުމާލޭ ހޮސްޕިޓަލަކީ ދުވާލަކު އެތައް ބަޔަކު ޚިދުމަތް ހޯދަމުން ދާ ތަނަކަށް ވުމުން އެ ކުންފުނީގެ އަމާޒަކީ އެ މުއްދަތުގެ ކުރިން މަސައްކަތްތައް ނިންމާލެވޭނެ ގޮތަކަށް ކަންކަން ތަރުތީބުކޮށްގެން މި މަޝްރޫއު ކުރިއަށް ގެންދިޔުން ކަމަށް އެ ކުންފުނިން ވަނީ ބުނެފައެވެ.