ގާނޫނު އަސާސީ އިސްލާހުކުރުމުގެ މަސައްކަތް ކުރިއަށްދާތީ ވެރިކަން ކުރާ ޕީއެންސީއާއި އިދިކޮޅު އެމްޑީޕީންވެސް ރައްޔިތުންގެ މަޖިލިސް ކުރިމަތީ މުޒާހަރާކުރަން ފަށައިފި އެވެ.

ގާނޫނު އަސާސީ އިސްލާހުކުރަނީ ޕާޓީ ބަދަލުކުރުމުން ގޮނޑި ގެއްލޭގޮަތަށާއި އަދިި މަޖިލީހުގެ ޖުމްލަ އަޣުލަބިއްޔަތުން ފާސްކޮށްގެން ނޫން ގޮތަކަށް ރައްޖޭގެ އެއްވެސް ސަރަހައްދެއްގައި ބޭރުގެ ސިފައިން ނުތިބެވޭ ގޮތް ހަދުމަށެވެ.

ހުޅުދޫ ދާއިރާގެ މެމްބަރު މުހައްމަދު ޝާހިދު ހުށައެޅުއްވި އެ ބިލު ހުށަހަޅައި ހަމަ މިއަދު އެ ބިލު ވަނީ މުޅި މަޖިލީހުގެ ކޮމިޓީއަށް ފޮޮނުވަައިފަ އެވެ. އަދި އެ ބިލު މަޖިލީހުގެ ތަޅުމުން ވެސް މިއަދު ފާސްކުރަން ވަނީ ނިންމައިފަ އެވެ.

އެ މައްސަލައިގައި އިދިކޮޅުން ފާޑުކިޔަމުންދާއިރު ރައްޔިތުންނާ އެއްވެސް މަޝްވަރާ ކުރުމެއް ނެތި ކުއްލި ގޮތަކަށް ސަރުކާރުން ޤާނޫނުއަސާސީ ބަދަލުކުރާތީ އެކަމާ ދެކޮޅަށް އަޑުއުފުލުމުގެ ގޮތުން އެމްޑީޕީން މިހާރު ދަނީ މުޒާހަރާ ކުރަމުން ނެވެ.

އަދި ޕީއެންސީގެ ސަޕޯޓަރުން ވެސް ދަނީ އެ ބިލު އަވަހަށް ފާސްކުރަން ގޮވާލައި މަޖިލިސް ކުރިމަތީ މުޒާހަރާ ކުރަމުން ނެވެ.

ގާނޫނު އަސާސީއަށް ބަދަލު ގެނެވޭނީ މަޖިލީހުގެ ތިން ބައިކުޅަ ދެބައިގެ ވޯޓުން ފާސްކޮށްގެން ނެވެ.

ޕީއެންސީގެ ސުޕަ މެޖޯރިޓީ މަޖިލީހުގައި އޮތުމާއެކު އެ ބިލު ފާސްވާނެ ކަމަށް ވަރަށް ބޮޑަށް ބެލެެވެ އެވެ.