ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި އިމާރާތް ކުރަމުން އަންނަ ހައުސިން ޔުނިޓްތަކުގެ ޓަވަރުތަކުގައި ހަދާ ކޮމާޝަލް ޖާގަތަކަށް ހުޅުވާލުމަށް ތައްޔާރުވާން ފަށައިފިއެވެ.

އެފްޑީސީން އިމާރާތް ކުރަމުން އަންނަ 4000 ހައުސިން ޔުނިޓުގެ 32 ޓަވަރުގައި 127 ކޮމާޝަލް ޔުނިޓް ދޫކުރުމަށް ނިންމާފައިވާ ކަމަށް އެ ކޯޕަރޭޝަނުން ބުނެއެވެ. މި ޖާގަތަކަކީ ރީޓެއިލް ފިހާރަތަކާއި، ކެފޭ ރެސްޓޯރެންޓްތަކާއި، ކްލިނިކްތަކުގެ އިތުރުން އޮފީސްތައް ވެސް ހިންގަން ލިބޭނެ ޖާގަތައް ކަމަށް އެފްޑީސީން ވަނީ ބުނެފައެވެ.

އަންނަ ހަފްތާއިން ފެށިގެން މި ޖާގަތައް ހޯދަން ކުރިމަތިލުމުގެ ފުރުސަތު ހުޅުވާލާނެ ކަމަށް އެފްޑީސީން ބުނެފައިވާއިރު މި ޓަވަރުތަކުގައި ގާތްގަނޑަކަށް 28،400 މީހުން ދިރިއުޅޭނެ ކަމަށް ބެލެވޭ ކަމަށް އެ ކޯޕަރޭޝަނުން ބުނެއެވެ.

މި ޓަވަރުތަކުގައި ކޮމާޝަލް ބޭނުމަށް ދޫކުރުމަށް ނިންމާފައިވަނީ 580-6200 އަކަފޫޓޫގެ ޖާގަތައް ކަމަށާއި އަގު އުޅެނީ އަކަފޫޓެއް 40-45 ރުފިޔާއަށް ކަމަށް އެފްޑީސީން ވަނީ ބުނެފައެވެ.

އެފްޑީސީން ބުނީ މި މަޝްރޫޢުގައި ޖުމްލަ 32 ޓަވަރު އިމާރާތް ކުރެވޭނެ ކަމަށެވެ. މި ޓަވަރުތަކުގައި ދިރިއުޅޭ ފަރާތްތަކަށް އަސާސީ އަދި އެހެނިހެން ބޭނުންތަކަށް ބޭނުންވާނެ ޚިދުމަތްތައް އެސަރަހައްދުން ލިބުމަކީ އެފްޑީސީން އިސްކަމެއް ދޭ ކަމެއް ކަމަށް އެ ކޯޕަރޭޝަނުން ވަނީ ބުނެފައެވެ. އެހެން ކަމުން އެފްޑީސީން ބުނީ އެ ޚިދުމަތްތަކާއި ވިޔަފާރިތައް ހުންނާނީ ހިނގާފައި ދެވޭނެ ދުރުމިންތަކަށް އިސްކަންދީގެން ހަ ޒޯނަކަށް ބަހާލެވިފައި ކަމަށެވެ.