މި ސަރުކާރުން މަސްވެރިންނާމެދު ކަންކުރަމުން ދާގޮތުން މަސްވެރިން ތިބީ އިނދަޖެހިފައިކަމަށް އެމްޑީޕީގެ ޗެއަރޕާސަން ފައްޔާޒު އިސްމާޢީލް ވިދާޅުވެއްޖެއެވެ.

މާލޭ މަސްމާރުކޭޓަށް މިއަދު އެމްޑީޕީގެ ލީޑަރޝިޕްގެ ބައެއް ބޭފުޅުން ވަނީ ޒިޔާރަތެއްކޮށް މަސްވެރިންގެ ހާލު ބައްލަވާފައެވެ.

އެ ޒިޔާރަތަށްފަހު ފައްޔާޒު މިރޭ އެކްސްގައި ވިދާޅުވީ، މިއަދު މަސް މާރުކޭޓު ސަރަހައްދުން މަސްވެރިންނާ ބައްދަލުވެ އެމީހުންގެ ކަންބޮޑުވުންތައް އަޑު އަހާލެވުނު ކަމަށާއި ސަރުކާރުން ކަން ކުރަމުންދާ ގޮތުން މަސްވެރިކަން އިނދަޖެހި ގިނަ މަސްވެރިން ތިބީ ވަރަށް ދަތި ހާލުގައި ކަމަށެވެ.

އަދި މަސްވެރިންނަށް ދޭން ބޭނުންވާ ޔަގީންކަމަކީ ހުރި ކަންބޮޑުވުންތައް ސަރުކާރަށް އަޑު އިއްވައިދީ، މަސްވެރިންގެ ހައްގުތަކަށް ވަކާލާތުކުރުމުގައި އެމްޑީޕީ ދެމިއޮންނާނެކަން ކަމަށް ފައްޔާޒު ވަނީ ވިދާޅުވެފައެވެ.

ފައްޔާޒު މިހެން ވިދާޅުވެފައިވާއިރު މަސްވެރިންގެ ހާލުބަލަން މާރުކޭޓަށް ވަޑައިގެންނެވިއިރު އެމްޑީޕީގެ ރައީސް ޝާހިދަށް އަންގާފައި ނުވާތީ ޝާހިދު ވަނީ ކަންބޮޑުވުން ފާޅުކުރައްވާފައެވެ. އަދި އެއާއި ގުޅިގެން ޕާޓީތެރޭ މައްސަލަތަކެއް އުފެދިފައިވާކަން ވަނީ ހާމަވެފައެވެ.