ގަވައިދާ ޚިލާފަށް ރާއްޖޭގެ ކަނޑުގެ ސަރަހައްދުގައި އުޅުނު ބޭރުގެ މަސް ބޯޓެއް ރާއްޖޭގެ ގައުމީ ދިފާއީ ބާރުން އަތުލައިގެންފިއެވެ.

އެމްއެންޑީއެފުން ބުނީ މި މަސް ބޯޓު އަތުލައިގަތީ އެމްއެންޑީއެފް ކޯސްޓްގާޑުން ހިންގި އޮޕަރޭޝަނެއްގައެވެ. މިއީ ކޮން ގައުމެއްގެ ބޯޓެއް ކަމެއް، މި ބޯޓުގައި ތިބީ ކިތައް މީހުން ކަމެއް، އަދި ބޯޓު އަތުލައިގަތީ ކޮން ސަރަހައްދަކުން ކަމެއް އެމްއެންޑީއެފުން އަދި ހާމައެއް ނުކުރެއެވެ.

ސިފައިން ހަމައެކަނި ހާމަކުރީ އެ ބޯޓުގެ ފޮޓޯއެކެވެ. ފޮޓޯއިން ހާމަވާގޮތުގައި މިއީ އަވައްޓެރި އިންޑިޔާ ނުވަތަ ލަންކާއަށް ނިސްބަތްވާ ބޯޓަކާ ވައްތަރެވެ. އެއީ މީގެ ކުރިންވެސް މިފަދަ ބޯޓުތައް އަތުލައިގެންފައިވާއިރު ކުރިން އަތުލައިގަނެވުނު ބޯޓުތަކާ މި ބޯޓާ އެއްގޮތްވާ ސިފަތައް ހުރުމުންނެވެ.

މީގެ އިތުރުން މި މަހުގެ 16 ވަނަ ދުވަހު ރާއްޖޭގެ ކަނޑުގެ ސަރަހައްދުގައި ގާނޫނާ ޚިލާފަށް ހަރަކާތްތެރިވި ބޯޓެއް ވެސް އެމްއެންޑީއެފުން ވަނީ އަތުލައިގެންފައެވެ. މި ބޯޓު އަތުލައިގެންފައިވަނީ އެމްއެންޑީއެފްގެ އެއަރކޯގައި ހިމެނޭ ޑްރޯން ބޭނުންކޮށްގެންނެވެ. މިއީ ޑްރޯން ބޭނުންކޮށްގެން މިފަދަ އުޅަނދެއް އަތުލައިގަތް ފުރަތަމަ ފަހަރެވެ.