ބޭންކް އޮފް މޯލްޑިވްސް އަށް ދައްކަންޖެހޭ ލޯނެއް ނުދައްކައިގެން ރައްޔިތުންގެ މަޖިލީހުގެ ކުރީގެ ނައިބު ރައީސް އަދި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކުގެ ހެވީ ލޯޑް ކުންފުނީގެ ތިން ރަށެއް ވިއްކާލަން ސިވިލް ކޯޓުން ބޭންކަށް ހުއްދަދީފައި އޮތް ގޮތަށް އެ ރަށްތައް ނީލަންކިޔުން މަޑުޖައްސައިލަން ހައިކޯޓުން އަމުރުކޮށްފި އެވެ.

ސިވިލް ކޯޓުން މި ރަށްތައް ވިއްކާލަން ދީފައިވާ ހުއްދައަށް އަމަލުކުރުން މަޑުޖައްސާލަން ހައިކޯޓުން އަމުރުކުރީ ހެވީ ލޯޑްގެ ފަރާތުން އެ މައްސަލަ އިސްތިއުނާފު ކުރުމާ ގުޅިގެންނެވެ. އެގޮތުން ހައިކޯޓުން މިއަދު ނެރުނު އަމުރުގައި ބުނެފައިވަނީ އެ މައްސަލައާ ގުޅިގެން އެ ކޯޓުން ގޮތެއް ނިންމަންދެން އެ ހުއްދައަށް އަމަލުކުރުން ފަސްކުރަން އަންގާ ކަމަށެވެ.

ހައިކޯޓުގެ އަމުރުގައި އިތުރަށް ބުނެފައިވަނީ ރަށްތައް ވިއްކައިލުމަށް ސިވިލް ކޯޓުން ހުއްދަދިނީ ރަށްތަކުގެ އަގުކުރުމާ ނުލައި ކަމަށެވެ. އެހެންކަމުން މައްސަލަ ނުނިމެނީސް ރަށްތައް ވިއްކައިފިނަމަ އެ މައްސަލައަށް އަސަރުކުރާނެ ކަމުގައި އަމުރުގައި ބުނެފައިވެ އެވެ.

މި މައްސަލާގައި ބޭންކުން ވިއްކައިލަން އިއުލާނުކޮށްފައިވަނީ ޓޫރިސްޓް ރިސޯޓުގެ ގޮތުގައި ހިންގާ ފަރެސް އައިލެންޑް، ކުޑަ ފަރެސް އައިލެންޑް އަދި ބޮޑު ހުރާ އައިލެންޑެވެ. މި ތިން ރަށް ވިއްކާލަން ބީއެމްއެލްއިން އިޢުލާނު ކޮށްފައިވަނީ ހެވީލޯޑް ކުންފުނިން ނަގާފައި އޮތް 11 މިލިއަން ޑޮލަރު ލޯނަކަށް ފައިސާ ނުދެއްކުމުންނެވެ.

އޭގެ ތެރެއިން ފަރެސް އާއި ކުޑަފަރެސްއަކީ ރަހާ ރިސޯޓް ހިންގަމުންދާ ދެ ރަށެވެ. އަދި ބޮޑުހުރާއަކީ ދަނޑުވެރި ކަމަށް ދޫކޮށްފައި އޮންނަ ރަށެކެވެ. އެ ރަށްރަށުގެ ހެޑް ލީޒް ހަމަވަނީ 2064 ވަނަ އަހަރު އެވެ.

ބޭންކުން ވަނީ މިރަށްތަކަށް ބިޑުކުރަން ޝައުގުވެރިވާ ފަރާތްތަކަށް އަންނަ މަހުގެ 28ވަނަ ދުވަހުގެ މެންދުރުފަހު 12ގެ ކުރިން ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފައެވެ.

ހެވީލޯޑްގެ ތިން ރަށެއް ވިއްކައިލަން އިއުލާނުކުރިއިރު މީރާއަށް ޓެކްސް ނުދައްކާ ކުންފުނިތަކުގެ ލިސްޓުގައި ވެސް އެކުންފުނި އެބައޮތެވެ.