ލޯބިވެރިޔާއަށް ބްލެކްމެއިލްކުރި ފުލުސް މީހާ ވަނީ ހެކި ނައްތާލަން މަސައްކަތް ކޮށްފައި ކަމަށް ފުލުހުން ކޯޓުގައި ބުނެފިއެވެ.

މި މައްސަލާގައި މި މަހުގެ 14 ވަނަ ދުވަހު ހައްޔަރުކޮށްފައި ވަނީ މަތިވެރި ޕޮލިސް ސްޓޭޝަނުގައި މަސައްކަތް ކުރަމުންދާ އެ ރަށު ފަޒާ، ޢުމުރުން 19 އަހަރުގެ ޒައިދާން މުހައްމަދެވެ.

އޭނާ އަށް ތުހުމަތު ކުރެވެނީ ލޯބިވެރިޔާގެ ބަރަހަނާ މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މިޑީއާގައި ލީކު ކޮށްލާނެ ކަމަށް ބުނެ ބިރުދައްކައި، އިންޒާރުދީ ބްލެކްމެއިލް ކުރިކަމުގެ ތުހުމަތެވެ.

މި މައްސަލާގައި ކްރިމިނަލް ކޯޓުން މިއަދު ނެރުނު ބަންދު އަމުރުގައި ބުނެފައިވަނީ، ޒައިދާނަށް ތުހުމަތު ކޮށްފައިވާ ކުށް އޭނާ ކުރިކަމަށް ތުހުމަތު ކުރެވޭ މިންވަރަށް ފުލުހުން ހެކި ހުށަހަޅާފައިވާ ކަމަށެވެ. އެގޮތުން، ފޮޓޯތައް ލީކް ކޮށްލާނެ ކަމަށް ބުނެ ބިރު ދެއްކުމުގެ ކަންކަން ހިނގާފައިވާ ކަމުގެ ހެކި އެ ކޯޓަށް ހުށަހަޅާފައިވާ ކަމަށް އެ އަމުރުގައި ބުނެފައިވެ އެވެ.

އަދި މައްސަލައިގެ ހެކި ނައްތާލުމަށްޓަކައި، ފޯނު ނައްތާލައިފައިވާ ކަމަށް ފުލުހުން ތުހުމަތު ކޮށްފައިވެ އެވެ. ކޯޓުން ނެރުނު އަމުރުގައި ބުނީ، އެކަމަށް ބާރުދޭ ހެކި ކޮންމެވެސް ވަރަކަށް ހުށަހަޅާފައިވާ ކަމަށެވެ.

އެހެންކަމުން ކްރިމިނަލް ކޯޓުން ވަނީ އޭނާ އިތުރު 10 ދުވަހަށް ބަންދުގައި ބެހެއްޓުމަށް އަމުރު ކޮށްފައެވެ.