ތަހުގީގުކުުރުމާ ގުޅޭ ގޮތުން އިތުރު ތަމްރީން ހޯދަން ފުލުހުންގެ ޓީމެއް ޗައިނާއަށް ފުރައިފި އެވެ.

ފުލުހުންގެ ހިދުމަތުން މިއަދު ބުނީ އެ ޓީމު ފުރީ ޗައިނާގެ މިނިސްޓްރީ އޮފް ޕަބްލިކް ސެކިއުރިޓީން އިންތިޒާމުކޮށްގެން ހިންގާ "ސެމިނަރ ފޯރ އިންޓަރމީޑިއެޓް އެންޑް ސީނިއަރ ޕޮލިސް އޮފިސަރސް" ގައި ބައިވެރިވުމަށް ކަމަށެވެ.

މިއަދުން ފެށިގެން މި މަހުގެ 14 އާ ހަމައަށް ޗައިނާގެ ހައިނަން ޕްރޮވިންސްގައި އޮންނަ އެ ސެމިނާގައި ރާއްޖޭގެ 15 ފުލުހަކު ބައިވެރިވާ ކަމަށް ފުލުހުން ބުނެފައި ވެއެވެ.

ފުލުހުން ބުނީ އެ ސެމިނާގައި ބައިވެރިވާ ފުލުހުންނަށް ޗައިނާގެ ރައީސް ޝީ ޖިންޕިންގގެ ގާނޫނީ ވިސްނުންފުޅުތަކާއި، ޗައިނާގެ ފުލުހުންގެ ސްޓްރެޓެޖީ، ފުލުހުންގެ ލީޑަރޝިޕް، ފްރޯޑް ހުއްޓުވުން، ކޮމިއުނިޓީ ޕޮލިސިންގ ނިޒާމު އަދި އާންމު ރައްޔިތުންގެ ސަލާމަތާއި ރައްކާތެރިކަމާ ގުޅޭ ދާއިރާތަކުން މައުލޫމާތާއި ތަޖުރިބާ ހިއްސާކުރާނެ ކަމަށެވެ. އޭގެ އިތުރުން، މައްސަލަތައް ތަހުގީގު ކުރުމާއި، ކެލިގްރަފީ އަދި ސްވޮޓް ޓެކްޓިކްސްއާއި ތާއި ޖީ (ސެލްފް ޑިފެންސް) އާ ގުޅޭ އަމަލީ ތަމްރީނުތައްވެސް އެ ސެމިނަރގައި ދޭނެ ކަމަށް ވެސް ފުލުހުން ބުނެފައި ވެއެވެ.